Гадаад харилцааны сайд Б.Батцэцэг, БНПУ-ын гадаад хэргийн сайд З.Рау нар албан ёсны хэлэлцээ хийсэн талаар мэдээллэсэн. Энэ үеэр Бүгд найрамдах Польш улсын гадаад хэргийн сайд З.Рау үг хэллээ. Тэрбээр: 

"Хатагтай ноёд оо,

Юуны өмнө найрсаг, үр дүнтэй хэлэлцээ хийсэнд Гадаад харилцааны сайд эрхэмсэг хатагтай Б.Батцэцэгт чин сэтгэлийн талархал илэрхийлье. Европын аюулгүй байдал, хамтын ажиллагааны байгууллагын даргын хувьд Монгол Улсад айлчлах үеэр Монгол Улсын Ерөнхийлөгч У.Хүрэлсүхт бараалхаж, төр, засгийн албаны бусад удирдлагатай уулзалт хийсэн нь миний хувьд нэр төрийн хэрэг байлаа.

Энэ жил Монгол Улс Европын аюулгүй байдал, хамтын ажиллагааны байгууллага (ЕАБХАБ)-ын 57 дахь гишүүнээр элссэний 10 жилийн ой тохиож байгаа. Монгол Улс Европын аюулгүй байдал, хамтын ажиллагааны байгууллагын идэвхтэй гишүүний нэг байж, өнгөрсөн хугацаанд үр дүнтэй хамтарч ажилласныг бид сайшааж байна.

Миний энэ айлчлал ЕАБХАБ-ын бүс нутгийн хувьд аюулгүй байдлын томоохон сорилттой тулгарч буй цаг үетэй давхцаж байна. ЕАБХАБ нь цэргийн мөргөлдөөнөөс урьдчилан сэргийлэх эрхэм зорилготой байгууллага юм. Өнгөрсөн 50 гаруй жилийн хугацаанд хөгжиж ирсэн энэ байгууллагыг аюулгүй байдлыг хангах тухай Хельсинкийн зарчмуудыг баримтлах түүний эрхэм зорилго, онцгой горимыг хүндэтгэх анхдагч зорилгоо хэрэгжүүлэхэд нь чиглүүлэхийг зорьж байна.

Монгол Улсын өөрчлөлтийн зорилтууд тухайлбал, хүний эрх, эрх чөлөөг дээдэлж, ЕАБХАБ-ын хүрээнд хүлээсэн үүрэг амлалтаа хэрэгжүүлж буйд баяртай байна. Хэлэлцээний үеэр бид эдийн засаг, соёл, шинжлэх ухаан зэрэг олон салбарт Польш, Монголын харилцаа, хамтын ажиллагааг өргөжүүлэх талаар ярилцлаа. Энэ чиглэлээр бодит үр дүн гарна гэдэгт итгэлтэй байна. Монгол Улс хөгжил, шинэчлэлийн зорилтуудаа хэрэгжүүлэхэд ЕАБХАБ дэмжлэг үзүүлэхэд бэлэн байгаа гэдгийг ЕАБХАБ-ын даргын хувьд нотлохыг хүсэж байна" гэв.