Монгол улсын Хөгжлийн банкны асуудлыг хянан шалгах түр хороо хуралдаж байна. Энэ үеэр Хөгжлийн банкны гүйцэтгэх захирал Н.Мандуул цаг үеийн мэдээллийг өглөө.

Түүний хэлснээр “Хөгжлийн банкинд төлөгдөх 3.2 их наядын чанаргүй зээл байгаагаас хувийн хэвшлийн 1.7 их наядын өрийн үлдэгдэл, төрийн өмчит компанийн 355.5 тэрбум төгрөгийн өрийн үлдэгдэл байна. Харин “Хөтөл” цементийн үйлдвэр, “Кью Эс Си” ХХК-ийн 521 тэрбум төгрөгийн зээл байна.

Монгол банкны актаар дээрх зээлд 505.3 тэрбум төгрөгийн эрсдэлийн сан байгуулах шийдвэр гарсан. Эрсдэлийн сан байгуулна гэдэг банкны хувьд шууд зардал болж бичигддэг.

"Кью Эс Си" ХХК-ийн зээлийн асуудал дээр шүүхийн шийдвэр гарсан. Хэрэв энэ хоёр зээлийн асуудал шийдвэрлэгдвэл Хөгжлийн банкны өөрийн хөрөнгийн хүрэлцээ 9.2 хувьд хүрэх юм" гэв. 

Харин Хөгжлийн банкны зүгээс хувийн хэвшлийн өрийн асуудлыг хариуцаж байгаа бол “Хөтөл” ТӨХК, “Кью Эс Си” ХХК болон төрийн өмчит компанийн зээлийн асуудлыг засгийн газар дэмжиж ажиллаж байгаа аж.

Т.Мөнхжаргал