УИХ-ын чуулганы хуралдаан эхэллээ. Хуралдааны үеэр УИХ-ын гишүүн Б.Пүрэвдорж үг хэллээ. Тэрбээр “Долоон жилийг таван жил болгох хуулийн төслийг хэлэлцүүлэхгүй өнөөдрийг хүртэл хойш нь татаж байна. Ард иргэдтэй холбоотой ажлыг хийхгүй байгаа нь хүмүүсийн бухимдлыг төрүүлж байна гэдгийг хэлье. С.Чинзориг даргатай ажлын хэсгийг хуралдуулах боломжийг даргын зөвлөл гаргаж өгөхгүй байна. Байнгын хорооны дарга ажил хийхгүй байна. Тэнд нэг хүн дуудаж загнадаг, өөр ажил хийхгүй байна.

Ирэх долоо хоногийн хэлэлцүүлэх ажлын жагсаалтад орохгүй бол Нийгмийн даатгалын сангаас 1кв газрыг 14 тэрбум төгрөгөөр худалдаж авсан тэр газар дээрээс хэвлэлийн бага хурал хийнэ.

Тэр 14 тэрбум төгрөг гэдэг бол 2019, 2020, 2021 оны хугацаанд долоон жилээр тэтгэврээ бодуулж гаргасан тэр бүх зөрүүг өгөхөд хангалттай хэмжээний мөнгө юм. Та нар нийгмийн даатгалын сангийн мөнгөнөөс завшихын тулд,  дарга нар шийддэг болохын тулд хүмүүсийн тэтгэврийг бага боддог тогтолцооноос салах ёстой. Олон улсын валютын сан аль хэдийн гараад явчихсан. Долоон жилээр тэтгэвэр боддог тэр тогтолцоо Манай улсад үлдсэн байна. Хэлэлцүүлэхгүй бол ахмадуудтай хамт тэмцэх болно” гэв. 

Д.Батчулуун