УИХ-ын чуулганы нэгдсэн хуралдаан үргэлжилж байна. Хуралдаанаар Төрийн албан хаагчийн ёс зүйн тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ж.Мөнхбат нарын 4 гишүүн 2022.05.27-ны өдөр өргөн мэдүүлсэн, хэлэлцэх эсэх асуудлаар хэлэлцэж байна. 

Энэ үеэр УИХ-ын гишүүн С.Чинзориг үг хэлж, асуулт асуулаа. Тэрбээр “Төрийн албан хаагчдаас ёс зүй шаардах нь зөв хэрэг л байх. Гэхдээ төрийн албан хаагчдаас ёс зүй шаардахын зэрэгцээ төрийн албан хаагчдынхаа эрх ашгийг хамгаалж чадаж байна уу? Төрийн албан хаагч шатлан дэвших зарчмаар ажил, албан тушаал хашна гэж Төрийн албаны тухай хууль хийгдсэн. Энэ хуулийг хэрэгжүүлэх дээр ТАЗ хангалтгүй ажиллаж байна гэж бодож байна. ТАЗ-ийн орон тоог нэлээн нэмсэн, Төрийн албан хуулийн хэрэгжилтийг хангуулахтай холбоотойгоор ТАЗ-ийн эрх хэмжээг нэлээн нэмэгдүүлж өгсөн. Төрийн албанд улс төрөөс ангид үйл ажиллагаа явуулах чадамж суухгүй байна” гэв.

Д.Батчулуун