Монголын амьдрал олон өнгөтэй. Ердөө ганцхан хоногийн өмнөх Төрийн ордон хавийн хоёрхон жишээг харьцуулъя.

Нэгдүгээр жишээ. Тархины саажилттай хүүхдүүдийн эцэг эхчүүд Төрийн ордны гадаа жагсав. Төр засагт үг нь хүрэхгүй байгаа учраас хүүхдүүдээ тэврээд жагсав, тэд. Цар тахлын хоёр жилд тархины саажилт, уналт таталт, тархины бусад эмгэгүүдэд хэрэглэдэг эм тариа хомсдсон. Ийм эм хэрэглэдэг хүүхдүүдийн эцэг эхчүүд, асран хамгаалагчид ЭМЯ-нд удаа дараа хандаж байсан ч хариу өгөөгүй, арга хэмжээ аваагүй учраас Төрийн ордоны гадаа ийн жагссан юм.

Хоёрдугаар жишээ. Саажилттай хүүхдүүдийн эм тасарсан, үнэ өндөр, олдоц муугаас асран хамгаалагчид нь төр засагт үгээ хүргэхээр хүүхдээ тэврэн жагсаж байх яг тэр мөчид Төрийн ордон дотор Нийгмийн бодлогын байнгын хороо хорт хавдрын өвчлөлийн талаар мэдээлэл сонсч, Донорын тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийж байв.

Хамгийн хоржоонтой нь ээ үед УИХ-ын гишүүн Б.Баярсайхан “Хорт хавдарт төсөвлөсөн өчнөөн мөнгөнөөс Завхан нутгийн дарга нарын илүүдэл жинд 70,80 сая төгрөг харамлалаа” хэмээн Эрүүл мэндийн сайдад бухимдав.

Тэрбээр “Би танд олон удаа бичиг явуулаад ямар ч хариу ирээгүй. Завхан аймгийн бүх төрийн албан хаагч нар илүүдэл жингээсээ салъя. Наадам хүртэл зөв хооллолтын багш нар, шим тэжээл судлаачид, хоол зүйчдийг аваачаад эрүүл хооллолтын төсөл хэрэгжүүлье. Зөв хооллодог мэдлэг чадварт суралцъя, хөдөлгөөнөө сайжруулж жин хасаад яаж эрүүлждэг гэдгийг ард иргэддээ харуулаад үлгэр дуурайлал болъё гэсэн. Үүнд зарцуулж байгаа нэг төгрөг ирээдүйд хорт хавдарт зарцуулах мөнгөнөөс хамаагүй илүү үр дүнтэй ажил байхад өчнөөн сая, хэдэн тэрбумаар нь хавдарт зориулсан мөнгөнөөсөө 70,80-хан сая төгрөгийг 78 мянгахан хүнтэй аймагт хуваарилж чадахгүй л байгаа байхгүй юу” гэв.

Үнэхээр хоржоонтой байгаа биз. Саажилттай хүүхдүүд эмээ авч чадахгүй арга мухардаад аав ээжтэйгээ жагсаж байхад сахалтай харцуулын харвинг арилгахад улсын төсвөөс 80 сая төгрөг зарцуулъя гээд бухимдаж байдаг төрийн түшээ байдаг гэхээр?

Т.Мөнхжаргал