Бурхан багшийн их дүйчэн өдрийг тохиолдуулан Бурхан багшийн цахиур, ринсрэлийг залах ёслол Төв Гандантэгчинлэн хийдэд болж байна. Энэ үеэр Монгол Улсын УИХ-ын дарга Г.Занданшатар нийт ард иргэд, сүсэгтэн олонд хандаж мэндчилгээ дэвшүүллээ.

Тэрбээр "Түүх, соёлын хосгүй үнэт өв болох бурхан багшийн шүтээнийг БНЭУ-ын Засгийн газрны дэмжлэгтэйгээр Монгол Улсад залж нийт сүсэгтэн олноороо өргөн дэлгэр тэмдэглэж байна. Монголын нийт сүсэгтэн олондоо УИХ-ын нэрийн өмнөөс болон хувиасаа Бурхан багшийн их дүйчэн өдрийн халуун мэндийг өргөн дэвшүүлье. Энэ өдрийг цаашид уламжлал болгон өргөн дэлгэр, бүтээлчээр тэмдэглэж байх нь шашин номын үйлс улам дэлгэржиж, хүн ард түмний дотор ирээдүй хойч үеийнхий зөв хүмүүжил, ёс суртахууны эрүүл оюун гэгээрэл төлөвшилд ач холбогдол өгнө  гэдэгт итгэлтэй байна. Нялхасыг баярлуулж, ядуусыг тэтгэж, эцэг эхийгээ ачилж, цагаан хоол идэж, хамаг амьтныг энэрч нигүүлсэх сэтгэлээр хандан өнгөрүүлдэг эртний уламжлалтай энэ өдөр хийсэн буяны үйл нь мянга түмээр аривжин дэлгэрэх болтугай.

Өнөөдрийн энэ бэлэг дэмбэрэлт сайхан өдөр Бурхан багшийн түүх, соёлын хосгүй үнэт өв, ринсрэл буюу шүтээнийг залсан БНЭУ-ын Засгийн газар, БНЭУ-ын хууль зүйн сайд Рижижу, БНЭУ-аас Монгол улсад суугаа элчин сайд нарт чин сэтгэлийн талархалаа илэрхийлье. Бурхан багшийн шүтээнд мөргөхөөр жилд таван сая жуулчин зочилдог гэдэг. Тиймээс цаашдаа соёл, аялал жуулчлалын төв болгон хөгжүүлэхэд Монгол Улсын соёлын бодлого чиглэж байгааг хэлэхэд туйлын баяртай байна. Энэ билэгт сайн өдөр Монгол Улсын иргэн бүр ирээдүйн сайн сайхныг зөгнөн мөрөөдөж, энэрэл, дотоод сэтгэлийн нигүүслийг эрхэмлэн дээдэлж, нэг  нэгнээ хүндэтгэн үндэсний эв нэгдэлээ нэгтгэж явахын өлзий дэмбэрэлтэй ерөөлийг өргөн дэвшүүлье. Буян хишиг сайн үйлс дэлгэрэх болтугай" гэв.

Т.Мөнхжаргал