Ардчилсан нам цаг үеийн мэдээлэл хийлээ. Ардчилсан намын дэд дарга Ч.Отгончулуу "Манай улсын эдийн засгийн эрүүл мэнд улаан гэрэл ассан хүнд байсан. Тэгвэл одоо илүү түвшин ахиж, түгшүүрийн харанга дэлдэх хэмжээнд иржээ. Саруул зах дээр махны үнэ 17.500 болж жилийн өмнөхөөс 25 хувиар өссөн байна. Харин Атар талх 1.800 төгрөг болж 40 хувиар, АИ-92 бензин 2.400 төгрөг болж 70 хувиар өссөн байна. Ирэх долоо хоногт дахиад өснө гэж байна. Инфляцийг 15 хувь гээд байгаа гэтэл бодит байдал дээр 50 орчим хувьд хүрсэн. Урьд нь бид жилийн инфляци 5-8 хувьд хүрлээ гэж сандардаг байсан бол одоо сарын инфляци таван хувь болсон. Долоо хоногийн дотор зарим хүнсний бараа 25 хувь өссөн байна. Жишээлбэл, Монгол төмс 2.400 төгрөг болжээ. Жилийн 15 хувийн инфляци сарынх болж хувирсан байна. 

Нэг эрчээ авсан инфляц буцдаггүй, эдийн засгийг сүйрүүлж дуусдаг.

УИХ-ын гишүүн Х.Болорчулуун "Монголын ард түмэн 1000 төгрөгөөр талх идэж байгаа нь дэлхийн хаана ч байхгүй хямд үнэ" гэсэн. Өөр нэг сайд монголчуудыг хамгийн хямд шатахуун хэрэглэж байна гэсэн. Гэтэл манай улсын талхны үнэ дэлхийн дунджаас арай өндөр. АИ95 шатахууны үнэ АНУ-тай адил хэмжээнд байгаа ч гэлээ АНУ-д дундаж цалин 3000 ам.доллар бол манайд 300 ам.доллар байдаг. Бид дэлхийн дундажаас гурав дахин бага орлогоор дэлхийн хэмжээний хэрэглээгээр амьдарч байна. Орлогоор нь харьцуулбал Монголын ард түмэн хамгийн өндөр өртөгтэй амьдарч буй үндэстэн болж хувирч байгаа шүү. Тиймээс одоо УИХ, Засгийн газар нойрноосоо сэрэх цаг болсон.

Монгол Улсын Ерөнхийлөгч хаана байна вэ. Мотоцикл унаад л яваад байх юм. Монголчууд бүгд үнэтэй мотоцикл унаад  хотынхоо гудамжаар салхи татуулаад, явмаар байгаа ч тал нь ядууралд орсон, давхар ажил хийгээд ч үр хүүхдээ тэжээж, аав ээжийгээ асарч чадахгүй хүнд байдалд ороод байна. Төр засаг гэж байдаг бол одоо сэрэх цаг болсон. Төрийн тэргүүн сонгогдоод нэг жил боллоо, одоо шокноосоо гарах цаг болсон" гэв. 

Т.Мөнхжаргал