Нийслэлийн засаг дарга бөгөөд Улаанбаатар хотын захирагч Д.Сумъяабазар Дугуй цагаан орчмын чөлөөлсөн талбайд хийх тохижилтын ажлын төлөвлөлтийг танилцуулж байна. Тэрбээр "Хотын даргын хувьд хувийн хэвшлийн бизнес үйл ажиллагааг байнга дэмжиж ажиллаж байгаа. Засаж сайжруулах зүйлээ хамтдаа зөвшилцөнө. Нөгөө талаас иргэдийн хүслийг төр, хувийн хэвшил хамтарч хангах ёстой.

Цаашдаа хамтарч ажиллана гэсэн итгэл үнэмшилтэй байгаа. Хүмүүсийн нэг хэсэг нь дугуй цагаан орчмын тохижилтыг анхаараад цэвэрлээд өгөөч гэхэд нөгөө хэсэг нь хувийн өмчид халдлаа, энэ байж болохгүй зүйл гэдэг. Харин ярилцаж байгаад хуулийн хүрээнд зохих түвшний ажиллагааг явуулсан. Үүнд хувийн хэвшлээс гомдолтой зүйл байгаа гэдгийг ойлгож байна. Гэхдээ иргэдийн 90 орчим хувь нь үүнийг хүсч байна.

Тиймээс хотын дарга бол иргэдийн хүслээ сонсоно. Тиймээс иргэдийг талцуулдаг, хэвлэл мэдээллийн байгууллага, цагдаа нарыг буруутай юм шиг эх захгүй зүйл болоод байгаа. Иймд төр хувийн хэвшлийн түншлэлийн хүрээнд орчны тохижилт, замын трасстай холбоотой асуудлыг засаж сэлбээд иргэдийн ая тухтай байх байдлыг хангах үүрэгтэй. Надад эндээс сөөм газар авах сонирхол алга. Чинхүү сэтгэл маань хүмүүс цугладаг, ая тухтай байдлыг бий болгосон иргэд сэтгэл хангалуун уул хангайдаа гардаг нөхцлийг бүрдүүлье гэдэг сэтгэл байна" гэв.

Т.Мөнхжаргал