Уул уурхай, металлургийн салбарт хөрөнгө оруулагчдийн “Металс Монголиа-2012” хоёрдугаар чуулга уулзалт ирэх сарын 8,9-нд “Чингис хаан” зочид буудалд болох гэж байна. Энэ удаагийн чуулга уулзалтын зорилго нь Монгол Улсын эдийн засгийг төрөлжүүлж, аж үйлдвэржсэн эдийн засгийн суурийг бий болгох Засгийн Газрын урт хугацааны зорилтыг хангах хүрээнд зохион байгуулагдах аж. Мөн уул уурхай, металлургийн салбарт байгаль орчинд сөрөг нөлөөлөл багатай, шинэ дэвшилтэд технологи бүхий ногоон хөрөнгө оруулалтыг татах, салбарын бодлого төлөвлөлтийг олон улсад сурталчилах, дэлхийн металлын зах зээлд Монгол Улсын өрсөлдөх чадварыг бэхжүүлэх зорилгын хүрээнд болох юм байна. Энэ удаагийн чуулга уулзалтад Уул уурхайн сайд Д.Ганхуяг, Үйлдвэр, хөдөө аж ахуйн сайд Х.Баттулга, Эдийн засгийн хөгжлийн дэд сайд О.Чулуунбат нар бодлогын илтгэл тавьж, олон улсын нэр хүндтэй судалгааны байгууллагын шинжээчид илтгэл тавьж, санал бодлоо солилцох гэнэ. Дашрамд өгүүлэхэд, өнгөрсөн жил анх удаа зохион байгуулсан “Metals Mongolia”-д нийт 1000 гаруй төлөөлөгч чуулснаас 20 гаруй орноос хөрөнгө оруулагчид иржээ. Тухайн үеийн ЭБЭХЯ-ны УУХҮБГ-ын дарга Б.Батхүү хэлэхдээ “Өмнө нь хүнд аж үйлдвэрийн салбарт ганц, хоёр орны хөрөнгө оруулалт яригдаж байсан бол “Металс Монголиа” чуулганаар Япон, Солонгос, Герман зэрэг олон орноос төлөөлөгч ирж, хэлэлцэл хийсэн нь Монголын хүнд аж үйлдвэрийн салбарыг дэлхийн хөрөнгө оруулагчид илт сонирхож байгаагийн баталгаа” хэмээн чуулганы ач холбогдлыг дүгнэсэн байна.