Ардчилсан нам цаг үеийн асуудлаар мэдээлэл хийлээ.

Ардчилсан намын  дотоод сонгуулийн хорооны дарга И.Мөнхжаргал “Хувь тэнцүүлсэн тогтолцооны зөв буруу тухай асуудлыг ярих гээгүй, Үндсэн хуулийн цэц нэг асуудлаар хоёр өөр шийдвэр гаргаж байгаа нь улс төрийн захиалгыг биелүүлдэг байгууллага болсон гэдгийг дахин нотолж байна. Өмнө нь Монгол Улсын Ерөнхийлөгчийн сонгуультай холбоотой асуудлыг улс төрийн захиалгаар гаргаж байсан. Үндсэн хуулийг тайлбарладаг, сахиулдаг байгууллага илт зөрүүтэй байдлаар хандаад байвал Монгол Улсад юу зөв, буруу байх юм бэ? Эрхэм Үндсэн хуулийн цэцийн гишүүд ээ, та бүгд энэ байгууллагаас үтэр түргэн өргөдлөө өгч явсан нь дээр. Үндсэн хууль бол Монгол улсын гурван сая иргэний хэрхэн амьдрах зөвшилцлийн баримт бичиг. Үүнийг нэг өдөр өөрөөр тайлбарлаж, нөгөө өдөр өөр өнцгөөр тайлбарлаж болдог зүйл биш. Нэг л зөв, Нэг л буруу байх ёстой.

Өнгөрсөн өдрүүдэд УИХ-ын гишүүд Үндсэн хуулийн нэмэлт өөрчлөлттэй холбоотойгоор тойрогтоо ажиллаа. Тойрогтоо очоод иргэдийн асар их шүүмжлэлтэй нүүр тулахдаа энэ их өрийг АН бий болгосон юм шиг, энэ өрийг төлөх гэж яваа юм шиг нийтэд ойлгуулахыг хүсэж, тоть мэт давтаж байна. Ичээрэй МАН-ын гишүүд ээ.

Эрх бариад зургаан жил боллоо, парламентын хоёр сонгууль дамнан төр удирдаж байна. Монгол улсын нийт өрийг хэлээд өгье. Өнөөдрийн байдлаар 33.8 тэрбум ам.долларын өртэй болсон байна. Энэ өр 2016 онд 24 тэрбум орчим байсан. Энэ арав гаруй тэрбум. ам доллароор та нар юу хийсэн бэ? Иргэд юунд бухимдаж байгааг мэдсэн үү?

Нийт өргөн хэрэглээний бараа бүтээгдэхүүний үнэ хоёр дахин өсөөд байна. Түлшний үнэ хоёр дахин нэмэгдсэн. Мах, ногоо гээд нэмэгдээгүй бүтээгдэхүүн алга. Энэ хэмжээгээр хүмүүсийн худалдан авах чадвар буураад байна.

Үүний хариуцлагыг 62 суудалтай эрх баригч МАН хариуцахгүй юм бол өөр хэн хариуцах юм бэ? Дотроо учраа олоогүй байгаа АН-д энэ үйлдлийг тохох чинь зөв үү? Ажлаа хий Ерөнхий сайд аа.

Монгол Улсын гурван сая иргэн, хууль, УИХ-ын өмнө нийгэм, эдийн засаг, хуулийн хүрээнд хариуцлагаа хүлээж байгаа хүн Монгол Улсын Ерөнхий сайд шүү. Хээр гадаа индэр дээр илтгэл тавих яах вэ, иргэнийнхээ эдийн засаг, худалдан авах чадварт анхаарлаа хандуулаач ээ. Үгүй бол суудлаа өгөөд яваач. Найр наадмын уур амьсгал ороод төрийн алба цалгардчихлаа, энд ажлаа хийж байгаа хүн байна уу? Эдийн засгийн хямралын үед ядаж төрийн албаныхан иргэдийг бухимдуулахгүй байхыг АН-ын зүгээс сануулж байна. Цаашид энэ үйл ажиллагаагаа засахгүй бол Ерөнхий сайдыг огцрох хэмжээнд шаардлага тавина гэдгээ АН-ын зүгээс мэдэгдэж байна.

Т.Мөнхжаргал