УИХ-ын чуулганы хуралдаан эхэллээ. Хуралдааны эхэнд УИХ-ын гишүүн үг хэллээ.

Тэрбээр "Үндсэн хуулийн өөрчлөлтийн талаар хоёр сум, нэг аймгийн төв дээр уулзалт хийлээ. Мөнххайрхан сумын н.Лождай гуай "Үндсэн хуулиас болж эдийн засаг унаагүй шүү" гэж анхааруулж байна. Мөн Дуут сумын иргэн н.Төртүвшин "Үнэ өссөн нь Үндсэн хуулиас болоогүй шүү" гэж хэллээ. Дуут сумын иргэд 4050 төгрөгөөр дизель түлш хэрэглэж хохирч байна гэлээ. Сүлдний асуудал дээр Мөнххайрхан сумын иргэн Вааз "Төсөл нь ч алга, одоохондоо хэрэггүй" гэлээ. Цаазын ялын талаар Жаргалант сумын иргэн Чулуунбаатар нэгэнт конвенцид нэгдсэн учир Үндсэн хуульд оруулах хэрэгтэй гэв. Цэцэд иргэн өргөдөл өгөх талаар Жаргалант сумын иргэн н.Цэвээн-Ойдов иргэн бүр Цэцэд өргөдөл гаргавал Цэцийн есөн гишүүн ачааллаа дийлэх үү гэж асууж байна.

Нийслэлийн эрх зүйн байдлын тухай асуудал, намын эвлэлдэн нэгдэх асуудлаар иргэд санал хэлсэнгүй. Ард түмэн хийдгээ хийчих, хийснийх нь дараа шүүмжилье гэсэн байдалтай байна. Учир нь төр засаг сүүлийн үед хэтэрхий сошиал дээр тулгуурлаж шийдвэр гаргадаг болсон учир ийм хандлагатай байна. Ард түмэн илүү шүүмжлэлт байдалтай байна. Хэтэрхий сошиал дээр тулгуурлан шийдвэр гаргах нь төрийг сулруулж байна. Нийт иргэдийн 65 хувь Үндсэн хуулийн нэмэлт өөрчлөлтийг эсэргүүцэж байна" гэв. 

Д.Батчулуун