Ерөнхий сайд Л.Оюун-Эрдэнэ Дархан-Улаанбаатар чиглэлийн автозамын бүтээн байгуулалтын ажлын явцтай танилцлаа. Тус замын тавдугаар багц буюу Цайдмын хөндийгөөс Дарханы тойрог хүртэлх 30.7км авто замын ажлыг "Чайна Жео" компани гүйцэтгэж байгаа бөгөөд ажлын гүйцэтгэл хангалтгүй гэж дүгнэсэн тул компанийн төлөөллүүдтэй уулзлаа.
Ерөнхий сайд Л.Оюун-Эрдэнэ "Нэг жилийн өмнө ирэхдээ та бүхэнд сүүлийн удаа боломж олгосон. Өнөөдрийн байдлаар Жанжин штабаас бусад ажил сайжраагүй байна. Би та нартай тоглоом тоглох гэж ирээгүй. Монгол Улсын Засгийн газар өгсөн мөнгөөрөө санхүүжилтээ шаардах гэж ирж байна. Танай байгууллагыг шалгаруулсан албан тушаалтнуудыг шалгуулахаар Авлигатай тэмцэх газарт өгнө. Хийсэн ажлын гүйцэтгэлтэй холбоотой аудит оруулах саналыг Азийн хөгжлийн банканд тавина. Тиймээс та нар санхүүжилтээ гаргаад энэ ажлыг хийвэл хий, боливол боль. Энэ ажлыг манай үндэсний аж ахуйн нэгжүүд хийх боломжтой. Яахаараа санхүүжилтээ гаргадаггүй юм. Авсан 1.4 сая ам.долларын санхүүжилтээр юу хийсэн юм бэ?"
“Чайна Жео” компанийн төлөөлөл "2021 оны есдүгээр сард гэрээ байгуулж хоолойны ажлаа эхлүүлсэн. Харин 2022 оны хоёрдугаар сараас эхэлж хатуу ухмалаа хийж гурван үйлдвэрээ барьсан. Өнөөдрийн байдлаар далан, ухмалын ажил дуусаж байна. Ирэх долоо хоногт асфальтад орно. Бараа материалын үнэ өссөн, бүх юмыг бэлэн мөнгөөр авдаг болсон. Өмнө нь түлшээ зээлээр авдаг байсан юм. Үүнээс шалтгаалж санхүүгийн доголдол үүсээд байна. Гэхдээ маргаашийн дотор түлшний асуудлыг шийднэ. Ажлаа үргэлжилж явуулна" гэв.
Т.Мөнхжаргал
Сэтгэгдэл (11)