Өчигдрийн УИХ-ын чуулганы нэгдсэн хуралдаан дээр Т.Энхтүвшин гишүүн “Замын-Үүдэд очиж ажилласан ажлын хэсгийнхэн буудалд бууж, идэж уусан 1.3 тэрбум төгрөгөө төлөөчээ. Нэртэй устай чинь зарлана шүү” хэмээн ярьсан.

Тэгвэл энэ талаар Дорноговь аймгийн Замын-Үүд сумын Засаг дарга Б.Анхбаяраас тодрууллаа. Тэрбээр "Чингэлэг тээврийн үйл ажиллагаатай холбоотой зардлын санхүүжилт дутуу байгаа асуудал. Нэгдүгээр сарын 11-нээс эхэлж чингэлэг тээврийн үйл ажиллагаа эхэлсэнтэй холбоотой Замын-Үүдэд тусгай горим үйлчилсэн шүү дээ. Үүнтэй холбоотой чингэлэг тээврийн зардлын үлдэгдэл санхүүжилт дутуу байгаа юм.

Сангийн яам руу тооцоо судалгаатай хүсэлтээ явуулчихсан. Тиймээс биш яг төрийн албан хаагчид ирээд идэж уугаад өр төлбөрт оруулсан асуудал байхгүй.

Зардалд тухайн үед чингэлэг тээвэр юугаар зөөж байсан түүний зардал. Төрийн тусгай чиг үүргийн байгууллагын жолооч нар хилийн тэг цэг дотор унах тээврийн хэрэгслийн түрээсийн зардал, тусгаарлалтын байрны зардал гэх мэт багтаж байгаа" гэсэн хариу өглөө. 

Т.Мөнхжаргал