Үндэсний их баяр наадмыг зохион байгуулах хорооноос мэдээлэл хийж байна. Энэ үеэр Хууль зүйн дотоод хэргийн яамны ТНБД П.Сайнзориг мэдээлэл өглөө.
Тэрбээр "Үндэсний баяр наадмын тухай асуудлыг 2003 оноос эхлэн хуульчилж ирсэн. Зарим нэг зүйл заалтууд ерөнхий байдлаар хуульчилснаар болоод энэ жил шинэчлэх шаардлагатай байна хэмээн энэ жил баталсан. Энэ жил баяр наадмын төрийн байгууллагын оролцоотой шийдээд явна. Бөхийн цол, сурын харваа болон шагайн харвааны хурдан морины уралдаантай холбоотой асуудлуудыг илүү тодорхой болгож өгсөн. Хурдан морины уралдааны стандарттай холбоотой зүйлүүдийг оруулсан. Энэ жил шилжилтийн зохицуулалттай явж байгаа. Одоогийн байдлаар 24,25 гадаад бөх барилдах хүсэлтийг ирүүлээд байна. Туваа улсын 15, Халимаг дөрөв, Буриадын дөрөв, Өвөрмонголын хоёр бөх хүсэлт ирүүлсэн. Баяр наадмаар иргэншил, ялгаварлан гадуурхалт байж болохгүй учир хүсэлтийг зохих ёсоор хүлээж авна. Эдгээр хүсэлт гаргасан бөхчүүд гол төлөв, Монгол туургатан гэдгийг хэлье.
Дөрөв, тавийн даваанд дархан аварга цолтой бөх зодох тайлах хүсэлт гаргах юм бол олон жил ард түмнээ цэнгүүлсэн алдрыг хүндэтгэж, есөн хөлт цагаан тугийг тойруулах, зодгоо шавь юм уу, үр хүүхдэдээ өвлүүлэх ёслолын арга хэмжээг зохионо.
1024 бөхийн барилдаанд улсын арслангаас доош цолтой бөх түрүүлбэл улсын аварга, улсын арслан цолтой бөх түрүүлбэл даян аварга, улсын арслан цолтой бөх үзүүрлэвэл улсын аварга тус тус болно. Засгийн газраас өргөн мэдүүлсэн хуульд допингийн шинжилгээнд үндэслэж буюу шинжилгээнд бүдрээгүй бөхөд цолны батламж олгоно гэж байсан ч хуульд өөрчлөлт орж уламжлалт байдлаараа буюу 12-ны өдөр амжилт үзүүлсэн бүх бөхөд батламж, цолыг олгохоор болсон. Допингийн шинжилгээг Тагнуул, Цагдаагийн байгууллагын хамтаар авах ба хэрэв допинг хэрэглэсэн нь нотлогдвол 14 хоногийн дотор Ерөнхийлөгч зарлигтаа өөрчлөлт оруулж, цол хураах, дараагийн бөхөд нөхөн олгохоор болсон" гэв.
Д.Батчулуун
Сэтгэгдэл (2)