Засгийн газраас сар бүрийн 2 дахь долоо хоногийн мягмар гарагт болдог “Шинэчилж шийдье-222” нээлттэй хэлэлцүүлэг өнөөдөр Төрийн ордонд болж байна. Хэлэлцүүлэг “Үрэлгэн төсөв, өгөөжгүй хөрөнгө оруулалт” сэдвээр явагдаж байгаа бөгөөд Ерөнхий сайд Н.Алтанхуяг, ЗГХЭГ-ын сайд Ч.Сайханбилэг нар оролцон иргэдийн санал бодлыг сонсож байна. Улсын төсвийг хэмнэхийх тулд ямар арга хэмжээ авч болох талаар иргэд саналаа хэллээ. Тэр дунд тендер, халамжийн бодлогын асуудал олон хөндөгдөж байв.

    Тухайлбал Улаанбаатар хотын зам засварыг хийхдээ хотын ногоон байгууламжийг сүйтгэж байна. Зам засварын компаниуд дэргэдээ ногоон байгууламжийн компанитай ч тэд нь стандарт, технологийн шаардлага хангадаггүй. Тиймээс их хөрөнгө, мөнгө гаргасан ногоон байгууламж сүйдэж, жилийн жилд дахин сэргээх болдогийг зохицуулах хэрэгтэй гэсэн санал гарлаа.
    Мөн өмнөх Засгийн газар уул уурхайн салбараас орж ирсэн мөнгөөс хуримтлал үүсгэх зорилт тавьсан ч өнөөдөр нэг ч төгрөг энэ санд бүрдээгүй байна. Тиймээс Шинэчлэлийн Засгийн газар нэг жилд уул уурхайгаас тэдэн төгрөгийн хуримтлал үүсгэж, тэд болгож өсгөнө гэх зэрэг тодорхой зорилт тавих хэрэгтэй байгааг иргэн А.Тамир хэлсэн юм.
    Засгийн газраас хүүхэд бүрт сард 20 мянган төгрөг бэлнээр өгч байгаа хэлбэрийг өөрчлөх нь зүйтэй гэсэн санал мөн гарав. Учир нь хүүхдийн мөнгийг зарим эцэг, эх хүүхэддээ зориулалгүй архи гэх мэт өөр зүйлд зарцуулж байна. Тиймээс 20 мянган төгрөгийг барааны карт хэлбэртэй болгож, тэр картаар зөвхөн хүүхдэд зориулсан бүтээгдэхүүн авах боломжийг бүрдүүлэх хэрэгтэй гэсэн санал хэллээ.

   Уг хэлэлцүүлэгт оролцогчдын ихэнхи нь төрийн бус байгууллагын болон хувиараа бизнес эрхэлдэг иргэд байгаа юм. Улсын төсвийг хэрхэн үрэлгэн байдлаас салгах тухай хэлэлцүүлэг үргэлжилж байна.