ОХУ-ын Гадаад хэргийн сайд Сергей Лавровын манай улсад хийж байгаа ажлын айлчлал эхэллээ. Зургаан жилийн өмнө Гадаад хэргийн сайд Л.Пүрэвсүрэнгийн урилгаар Монгол Улсад хийсэн албан ёсны айлчлалын үеэр поло футболка, жинсэн өмдтэй ирж байсан Сергей Лавров энэ удаа албаны хувцастайгаар айлчлалаа эхлүүлж байна.

Түүнийг тэр үед нь Гадаад хэргийн Төрийн нарийн бичгийн дарга Д.Ганхуяг улаан хивс, хүндэт харуул жагсаан угтан авч байв. Ингэж Монголын тал хүндэтгэн угтсан ч албан ёсны айлчлалаа эхлүүлж байгаа ОХУ-ын Гадаад хэргийн сайд нь ёслолын бус хувцастайгаар онгоцноос буусан нь олон шүүмжлэлийг өрнүүлж байлаа.

Тухайн айлчлалаар Сергей Лавров Монгол Улсын Ерөнхийлөгч Ц.Элбэгдорж, Ерөнхий сайд Ч.Сайханбилэг нарт бараалхаж, Гадаад хэргийн сайд Л.Пүрэвсүрэнтэй ганцаарчилсан уулзалт хийсэн юм. Энэ айлчлалаар “Хоёр улсын хоорондын стратегийн түншлэлийг хөгжүүлэх тухай дунд хугацааны хөтөлбөр”-ийг эцэслэн баталж гарын үсэг зурж байв. Ерөнхий сайд Ч.Сайханбилэг хоёр улсын Төв банк хоорондын үндэсний мөнгөн тэмдэгт солилцох своп хэлцэл хийх, хоёр орны худалдаанд үндэсний мөнгөн тэмдэгт ашиглах сонирхолтой байгаагаа илэрхийлж байсан билээ. Айлчлалынхаа хүрээнд Сергей Лавров “ОХУ-ын Зүүн Хойд Ази дахь гадаад бодлого” сэдвээр Гадаад хэргийн яамны байранд лекц уншиж байв.

Харин өдгөө зургаан жилийн дараа ОХУ Украин улс руу дайран довтлосон энэ үед Сергей Лавров ажлын айлчлал хийхээр манай улсад ирээд байна. Түүнийг өмнөх шигээ Төрийн нарийн бичгийн дарга угтан авсан бөгөөд ялгаатай нь хүндэт харуулгүйгээр угтан авч байна. Айлчлалын үеэр С.Лавров Монгол Улсын Ерөнхийлөгч У.ХҮрэлсүх, УИХ-ын дарга Г.Занданшатар, Ерөнхий сайд Л.Оюун-Эрдэнэ нарт бараалхаж, Гадаад харилцааны сайд Б.Батцэцэгтэй хэлэлцээ хийнэ. Айлчлалаар Монгол, Оросын хилийн шалган нэвтрүүлэх боомтуудыг шинэчлэн өргөтгөх, “Алтанбулаг”, “Цагаанннуур” чөлөөт бүсүүдэд Оросын талаас хөрөнгө оруулалт хийн хамтарсан ажиллагаа эрхлэх, газрын тосны бүтээгдэхүүний найдвартай нийлүүлэлтийг хангах, эрчим хүч, соёл, боловсролын салбарт хамтран ажиллах зэрэг асуудлаар талууд ярилцахаар төлөвлөсөн байна.

О.Балдан-Очир