Өнөөдөр Хэлмэгдэгсдийн хөшөөний урд Э.Бат-Үүл тэргүүтэй иргэд дайныг эсэргүүцэж тайван жагсаал хийж байна. ОХУ-ын Гадаад хэргийн сайд С.Лавров өнөөдөр өглөө Монгол Улсад айлчлал хийхээр ирсэн. Тэгвэл тэдний зүгээс энэ айлчлал дайныг дэмжүүлэх гэсэн шахалт хэмээн үзэж буйгаа хэлж байлаа. Энэ үеэр Э.Бат-Үүл ингэж хэллээ. 

Тэрбээр "Өнөөдөр бид дайныг эсэргүүцэж тайван жагсаал хийж байна. ОХУ-ын Гадаад хэргийн сайд С.Лавров Монгол Улсад айлчлал хийж байгаа явдалыг эсэргүүцэж Монголын Оросын суганы үс болгохыг эсэргүүцэж байна. Ардчилсан Украйн улс руу түрэмгийлсэн В.Путины түрэмгийлэгчдийг эсэргүүцэж иргэнийхээ хувьд цуглаж байна. С.Лавровын айлчлал нууц хэлбэрээр явагдаж байна. Эх сурвалжуудын мэдээллэж байгаагаар энэхүү уулзалтаараа Монгол Улсыг шахаж дайныг дэмжүүлэх ирж байна.

Бид Украйнчуудтай эв санааны нэгдэлтэй байгаа. ЗХУ-ын суганы үс байх үеийн зовлонг сайн мэднэ. Их гүрний суганы үс байх үедээ бид 40 мянга орчим гэм зэмгүй иргэдийн амь насыг сүйтгүүлсэн. Сталины шахалтаар олон төрийн зүтгэлтнүүдээ цаазлуулсан. Монголын хэргийн Москва шийддэг байсан. Энэ гамшгийг үзээд бид 1990 онд Ардчилсан хувьсгал хийсэн. Хөрш орноо түрэмгийлэхдээ ОХУ эхлээд троллуудаа илгээж, дараа нь цэргийн ажиллагаа явуулсан. Одоо Монголд яг тийм үйл явдал болж байна. Цахим орчинд В.Путины троллууд олон байна. Өнөөдөр С.Лавров айлчилж түрэмгийллээ шахах гэж ирсэн гэж бидний зүгээс харж байна.

Энд ирсэн Д.Сосорбарам, Г.Ганхүү болон партизаны төлөөллүүд маань 1990 онд ЗХУ-ын суганы үс байхгүй гэж тэмцэж байсан. Харин өнөөдөр бид ард иргэдийнхээ зүрх зоригийг сэрээх гэж ирлээ. Д.Сосорбарам бид хэд энэ тэмцлээсээ буцахгүй. Монголыг хэзээ ч суганы үс болгохгүй, С.Лавров тэгж бодож байвал санааны гарз” гэв.

Т.Мөнхжаргал