Манай тусгай сурвалжлагч С.Ононтуул Бүгд Найрамдах Сингапур Улсаас мэдээлж байна.
Монгол Улсын Ерөнхий сайд Л.Оюун-Эрдэнийн Бүгд Найрамдах Сингапур Улсад хийж байгаа албан ёсны айлчлал (2022.07.07) тус улсын хөрөнгийн нөөцийг бүрдүүлдэг санхүүгийн голлох гурван байгууллагын нэг “Темасек холдинг”-ийн “Темасек” олон улсын сангийн удирдлагуудтай уулзсанаар эхэллээ. Улсынхаа Сангийн яамнаас анхныхааа хөрөнгө оруулалтыг авч, 1974 онд үүсгэн байгуулагдсан “Темасек холдинг” нь 405 тэрбум сингапур долларын хөрөнгө оруулалттай, дэлхийн 9 улсад төлөөлөгчийн газартайгаар үйл ажиллагаа явуулдаг.
Ази, Номхон далайн орнуудын хамтын ажиллагааг хөгжүүлэх, бүс нутгийн өөр соёл иргэншилтэй иргэд хоорондын харилцан ойлголцлол, нөхөрлөлийг бэхжүүлж нийгмийн капитал бүтээх замаар бүс нутгийн хөгжил цэцэглэлтэд хувь нэмэр оруулах зорилгоор “Темасек холдинг” нь 2007 онд “Темасик сан”-г үүсгэн байгуулсан юм.
Энэ сангийн гурван гүйцэтгэх зөвлөлийн нэг нь Монгол Улсын Ерөнхий сайд Л.Оюун-Эрдэнийн албан ёсны айлчлалын хүрээнд зочилсон олон улсын сан юм. “Темасек” олон улсын сан нь 13 төсөл хөтөлбөрийг манай улсад хэрэгжүүлж буй. Үүний тав нь боловсрол, гурав нь эрүүл мэнд, тав нь байгууллагын тогтолцооны чиглэлээр хэрэгжүүлсэн төсөл хөтөлбөрүүд. Манай улстай ийм хамтын ажиллагаа хэрэгжүүлдэг олон улсын сангийн удирдлагууд Сингапур улсад хийж байгаа айлчлалынх нь үеэр Монгол Улсын Ерөнхий сайд Л.Оюун-Эрдэнэд бараалхлаа.
“Темасек” сан нь нийгэмд хүртээмжтэй төсөл хөтөлбөрүүд хэрэгжүүлдэг амжилтыг бүс нутгийн улс орнуудын салбар бүрээс томилогдсон чадварлаг удирдлагатай нь холбон тайлбарладаг. Дэлхийд ийм сайн туршлагаараа тэргүүлдэг сангийн удирдлагууд Монгол Улсын Ерөнхий сайд Л.Оюун-Эрдэнэд бараалхах үеэр тус сангийн сайн туршлагуудыг Монголын Төрийн өмчит компаниудад хэрэгжүүлэхийг зорьж буйгаа Ерөнхий сайд дурдлаа. Төрийн өмчит компаниудын засаглалыг сайжруулах зорилтын хүрээнд Монголын Хөрөнгийн биржийг олон нийтийн, нээлттэй хувьцаат компани болгохоор ажиллаж байгаа. Энэ хүрээнд Монголын Хөрөнгийн биржийн 34 хүртэлх хувийг хувьцаа гаргах замаар аэнэ онд багтаан олон нийтийн хяналтад оруулах, нээлттэй компани болгохоор шийдвэрлээд байгаа бөгөөд IPO, менежментийг сайжруулах тал дээр Сингапур улстай хамтран ажиллах саналтай байгаагаа Монгол Улсын Ерөнхий сайд хэллээ.
Төрийн өмчит компаниудын засаглалыг сайжруулан олон улсын жишигт нийцүүлэхэд “Темасек” холдинг”-той хамтран ажиллах хүсэлтэй байгаагаа Ерөнхий сайд дурдаад нэн тэргүүнд “МИАТ” ТӨХК-ийг сонгон загвар маягаар техникийн зөвлөгөө авах хүсэлтээ илэрхийллээ. Олон улсын сангийнхны бараалхалтын үеэр Монгол Улс “Эрдэнэс Монгол” компанийг түшиглэн баялгийн сантай болох гэж байгаа, түүнийгээ Сингапурын туршлагаар байгуулахыг зорьж байгаа гэдгээ Монгол Улсын Ерөнхий сайд Л.Оюун-Эрдэнэ хэллээ.
