Манай тусгай сурвалжлагч С.Ононтуул Бүгд Найрамдах Сингапур Улсаас мэдээлж байна.

Монгол Улсын Ерөнхий сайд Л.Оюун-Эрдэнийн Бүгд Найрамдах Сингапур Улсад хийж байгаа албан ёсны айлчлалын хоёр дахь өдрийн содон ТАВАН МЭДЭЭ.

Нэг. Монгол Улсын төрийн орон сууцжуулалтын салбарын боловсон хүчний чадавхийг бэхжүүлэх, холбогдох сургалтуудыг зохион байгуулахад “Темасек” олон улсын сангаас 232.420 сингапур долларын буцалтгүй тусламж үзүүлнэ. Мөн сургалтын зардлын тодорхой хэсэг буюу 86.600 сингапур долларын санхүүжилтийг БХБЯ-аас хариуцна. Өнөөдрийн Монголбанкны ханшаар нэг сингапур доллар 2242.9 монгол төгрөгтэй тэнцэж байна.

Хоёр. Монголын Хөрөнгийн биржийг олон нийтийн, нээлттэй хувьцаат компани болгох бөгөөд энэ ондоо багтаан 34 хүртэлх хувийг хувьцаа гаргах замаар олон нийтийн хяналтад оруулах, нээлттэй компани болгохоор шийдвэрлэсэн. IPO, менежментийг Сингапурын талтай хамтран хийх хүсэлт Монгол Улсын Ерөнхий сайд Л.Оюун-Эрдэнэ тавилаа.

Гурав. Монгол Улсын шинэ нисэх онгоцны буудлыг бүс нутгийн хэмжээний тээвэр, логистикийн зангилаа болгох, нисэх онгоцны буудлыг түшиглэн Хөшигийн хөндийд шинэ хот, эдийн замгийн чөлөөт бүс байгуулахаар төлөвлөсөн. Энэ хүрээнд транзит Монгол Улсын зангилаа бий болгох, аялал жуулчлалыг татах чиглэлд Сингапурын сайн туршлагыг нэвтрүүлэх, олон улсын болон Сингапурын хөрөнгө оруулалтыг татахад шаардлагатай эрх зүйн орчныг Английн хуулийн жишгээр бүрдүүлэх талаар хамтран ажиллах санал гаргалаа.

Дөрөв. Монгол Улсын баялгийн санг “Эрдэнэс Монгол” компанийг түшиглэн байгуулна. Зургаан тэрбум нүүрсний нөөц баялагтай, үүний 1.4 тэрбум нь коксжих нүүрсний нөөцтэй Тавантолгойн орд газрыг эзэмшдэг “Эрдэнэс Монгол”-ыг түшиглэн байгуулах баялгийн санг Сингапур улсын туршлагаар байгалийн баялгаас олсон ашиг орлогоо зөв хуваарилах, улс орныхоо эдийн засгийн хөгжлийн төлөө зарцуулахаас гадна хуримтлал үүсгэх, өсгөх хэлбэрээр иргэдийнхээ сайн сайхны төлөө зарцуулахыг эрмэлзэж буй.

Тав. Уул уурхайн баялгийг Тэтгэврийн сангаар дамжуулан байрны урьдчилгааг шийдвэрлэсэн тохиолдолд Монгол Улсын нийт иргэдийг орон сууцаар хангах боломжтой. Өөрөөр хэлбэл Сингапурын Төрийн орон сууцжуулалтын санхүүжилтийн тогтолцоогоор жишээгээр урьдчилгаа төлбөр төлөх боломжгүй иргэдийн асуудлыг шийдэх боломж байгаа юм.