"Гүний уурхайг хугацаанаас нь өмнө ашиглалтад оруулахаар ажиллаж байна"

2022-7-15

Монгол Улсын Ерөнхий сайд Л.Оюун-Эрдэнэ 2022 оны долдугаар сарын 14-нд Рио Тинто группийн Гүйцэтгэх захирал Якоб Стаусхольмыг хүлээн авч уулзлаа.

Уулзалтын үеэр “Оюу толгой” ордын ашиглалтад Монгол Улсын эрх ашгийг хангуулах тухай УИХ-ын тогтоолын хэрэгжилт, Рио Тинто групптэй хийж буй Засгийн газрын хэлэлцээний явцын талаар санал солилцов.

Засгийн газрын Шинэ сэргэлтийн бодлогын нэг хэсэг болсон Аж үйлдвэрийн сэргэлтийн хүрээнд Оюу толгойн гүний уурхайн үйлдвэрлэл энэ оны нэгдүгээр сард эхэлж, Монгол Улсын Ерөнхий сайд Л.Оюун-Эрдэнэ, Рио Тинто группийн гүйцэтгэх захирал Якоб Стаусхольм нар оролцож гүний уурхайн үйлдвэрлэлийн эхний шат буюу анхны тэсэлгээ хийх командыг өгсөн юм.

Гүний уурхайн бүтээн байгуулалтын ажлыг 2023 оны эхний улиралд багтааж бүрэн ашиглалтад оруулахаар талууд харилцан тохиролцсон бөгөөд гүний уурхайн бүтээн байгуулалтын ажлыг эрчимжүүлж, хугацаанаас нь өмнө ашиглалтад оруулахаар ажиллаж байгаа, яриа хэлэлцээнүүд амжилттай үргэлжилж, ойлголцохгүй асуудал гарахгүй байгааг Рио Тинто группийн Гүйцэтгэх захирал Якоб Стаусхольм хэлж байлаа.

Энэ оны тавдугаар сард Өмнөговь аймгийн “Ханбогд хөгжлийн ерөнхий төлөвлөгөө-2024” хамтын ажиллагааны санамж бичигт БХБ-ын сайд Б.Мөнхбаатар, "Оюутолгой" ХХК-ийн гүйцэтгэх захирал Дэйрдрэ Лингенфэлдер, Өмнөговь аймгийн Засаг дарга Р.Сэддорж, Ханбогд сумын Засаг дарга Х.Нэхийт нар гарын үсэг зурж баталгаажуулсан бөгөөд энэ уулзалтын үеэр ч мөн Өмнөговь аймгийн Ханбогд, Цогтцэций болон бусад сумын хөгжил, хөрөнгө оруулалтын талаар ярилцлаа.

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл (4)

Зочин (139.5.216.41)

Тэгээд баярлах юмуу. Гадна дотны хэдэн луйварчид юу ч хийж байгааг хэн мэдлээ. Ямар ч байсан иргэдэд бол нэг их ашиггүй л байх

2022 оны 07 сарын 16 | Хариулах
Зочин (59.153.85.137)

Хөрөнгө оруулалтын болон Хувь нийлүүлэгчдийн гэрээнд Туркойс Хилл нэртэй компани байхгүй. Рио Тинто, Айвенхоу хоёр энэ компаниар дамжуулан зээл, санхүү, хөрөнгө оруулалтын луйвар хийх өөрсдийн зам мөрөө засаж тавьсан нь судалгааны явцад харагддаг. Энэ компанийн жинхэнэ эзэд нь нууцлагдмал байдаг бололтой. Оюу толгой гэсэн нэрийг англиар Туркойс Хилл(Turquoise Hill) гэж нэрлээд учир бмитүүлэг энэ компани Канадын Montreal хотод байршилтай юм билээ. Хамгийн хачирхалтай нь нэг компанийн үйл ажиллагаа цаасан дээр хоёр компанийн үйл ажиллагаа мэт харагдаж, Монгол Улс, Канадад эдгээр нь бүртгэлтэй байгаа юм. Монголын Оюу толгой компани байнга алдагдалтай ажилладаг, гэтэл Канадын Оюу толгой(Turquoise Hill) компани ашигтай ажиллаж, нууц эзэддээ ногдол ашиг хүртээдэг нь ямар учиртайг манай улсын Сангийн яам, Татварын ерөнхий газар ард түмэнд ил тод ойлгомжтой байдлаар танилцуулах байх гэж итгэе.

2022 оны 07 сарын 15 | Хариулах
Зочин (59.153.85.137)

Монголчууд бид ОТ бүлэг ордын хүдэр дэх зэс, алт, мөнгө, молибдени зэргийг агуулсан үнэт баялгаасаа олон улсад баримталдаг ёс журмын дагуу хувь хүртэнэ гэж бодож байгаа бол юуны түрүүнд Хөрөнгө оруулалтын болон Хувь нийлүүлэгчдийн гэрээний Монгол Улсад хор хохиролтой заалтуудыг засаж залруулахааас эхлэх, мөн ОТ төслийн хөрөнгө оруулалтын хэтрэлт гэх нотолгоо баталгаагүй илт луйварыг таслан зогсоож, Засгийн газар, Сангийн яам Рио Тинто, Туркойс Хиллд алдаад байгаа 5-6 тэрбум ам.долларыг эргүүлэн авах, тэгэхдээ ОТ компанийн америкийн талын жижиг хувьцаа эзэмшигчдийн Нью Йорк мужийн шүүхэд гаргасан нэхэмжилтэй дээрх асуудлыг уялдуулан холбож шийдвэрлэх нь монголын талын язгуур эрх ашигт бүрэн нийцнэ.

2022 оны 07 сарын 15 | Хариулах
Зочин (59.153.85.137)

УИХ, Засгийн газар Рио Тинто-ийн Гүйцэтгэх захирал Якоб Стаушолмын урхинд орсон, одоо дахин ямар урхи тавих гэж ирсэн юм бол?, амтшисан хэрээ 13 эргэнэ гэдэг болж байна уу?. УИХ-ын 2021 оны 12-р сарын 103 дугаар тогтоолын зарим заалт Рио Тинто-ийн эрх ашиг давамгайлсан байдалтай байгаа юм. Энэ шийдвэрийг Монгол Улсын эрх ашигт болон Үндсэн хуулийн холбогдох заалтад нийцүүлэн Үндэсний Аюулгүй байдлын Зөвлөл авч үзэж, Үндсэн хуулийн холбогдох заалтын дагуу засаж залруулах зайлшгүй шаардлагатай юм.

2022 оны 07 сарын 15 | Хариулах