Хөгжлийн банкны зээлдэгчдийн мэдээлэлтэй холбоотой асуудлаар Сангийн сайд Б.Жавхланд танилцууллаа. 

Тэрбээр "Хөгжлийн банкны үйл ажиллагааны явц, өмнө нь өгсөн үүрэг даалгавар хэрхэн биелэгдсэн, цаашид яаж ажиллах талаар газар дээр нь ажиллаж байна. Өмнө нь мөн тодорхой мэдээлэл өгсөн.  Нэгдүгээр сарын сүүлээс хойш Хөгжлийн банк хуулийн хүрээнд татан буугдах хэмжээнд хүрсэн байсан. Хагас жилдээ 300 гаруй тэрбумын чанаргүй зээл төлүүлэх төлөвлөгөөтэй ажилласан. Тавдугаар сарын 30-ны байдлаар бэлэн мөнгөөр 481 тэрбум төгрөгийн муу зээл төлөгдлөө. Энэ жилдээ багтаад нэг их наядын зээл төлүүлчих төлөвлөгөөтэй байна.

Нөхцөл байдал амаргүй. Чанаргүй зээлүүдийн цаана бүтэлгүйтсэн төслүүд байдаг. Тэр бүгдийг төлүүлэхээр таван чиглэлээр ажиллаж байна. Тухайлбал, барьцаа хөрөнгөтэй шууд ажиллаж байна, шүүхийн шийдвэрээр ажиллаж байна. өмчийн эзэмшилд нь халдах, бүтцийн өөрчлөлт хийх байдлаар, мөн хослуулж ажиллаж байна. Түүнчлэн ямар ч барьцаа хөрөнгийн шаардлага хангахгүй болсон, эргэн төлөгдөх эх үүсвэр тодорхойгүй болсон гурван зээл байгаа юм.

• Нэгдүгээрт, Хөтөлийн 329 тэрбумын зээл. Хувьчилсан. Одоогоор зээл нь хаанаас яаж төлөгдөх нь тодорхойгүй шинэ нөхцөл байдал үүссэн нь харамсалтай. Гэхдээ бид үүнийг төлүүлэх тал дээр ажиллаж байна.
• Хоёрдугаарт, Эрэл компанийн 129 тэрбумын зээл. Маш тодорхойгүй, эрсдэл өндөртэй байна. Барьцаа нь шаардлага хангахгүй. Зээлийн хөрөнгөөр бий болсон төсөл нь зогссон.
• Гуравдугаарт, "Газ импорт"компанийн 8 тэрбумын зээл. Барьцаа хөрөнгө нь тодорхойгүй. Ийм байдлаар чанаргүй зээлүүд дээр ажиллаж байна.

Бидний том зорилго бол Хөгжлийн банкийг дампуурлын эрмэгээс аврах, хэвийн үйл ажиллагаанд нь оруулах, 2023 оны есдүгээр сард төлөгдөх евро бондын 500 сая доллар, арванхоёдугаар сард төлөгдөг Самурай бондын 720 тэрбум төгрөгийн зээлүүдийг хөгжлийн банкны өөрийн эх үүсвэрээр төлүүлэх зорилт тавьж ажиллаж байна. Чанаргүй зээл төлөгдсөн хэмжээ, цаашид ажиллах байдлаас харвал энэ эрсдэлээс гарах бүрэн боломж байна. Засгийн газрын зүгээс бүх талаараа дэмжлэг үзүүлж ажиллана. Энэ чанаргүй зээлүүд дотор төрийн өмчийн үйлдвэрийн газрууд, эхлэх гэж байгаа төслүүд холбоотой санхүүжүүлэлт гарсан байдаг. Үүнд төр 100 хувь хариуцлага хүлээх ёстой" гэв. 

Д.Батчулуун