Улс оронд болж буй аливаа халуун явдлуудыг атгаж авдаг улстөрчдийн нэг бол Т.Аюурсайхан. Өмнө нь 2000-2005 онд "Аста Пресс" ХХК-д Ерөнхий захирал, 2006 онд "Баярс констракшн" ХХК-д эдийн засгийн зөвлөх, 2006-2009 онд Ерөнхийлөгч асан Н.Багабандийн шадар туслах, 2008-2012 онд Чингэлтэй дүүргийн ИТХ-ын төлөөлөгч, тэргүүлэгч, ИТХ-ын Экологи, байгаль орчин, тохижилт, үйлдвэрлэл, үйлчилгээний хорооны дарга, 2012 онд Чингэлтэй дүүргийн Засаг даргаар ажиллаж байсан. Тэр жилдээ мөн МАН-ын Шинэчлэл хөгжлийн хороог байгуулж Бодлогын зөвлөлийн дарга нь болсон.

Т.Аюурсайхан 2013 онд МАН-ын даргад нэр дэвшин өрсөлдөж байсан. Улмаар 2016 онд УИХ-д нэр дэвших квот авч өрсөлдөөд сонгогдсон. 2020 онд дахин нэр дэвшээд дахиад сонгогдсон. Одоо УИХ-ын дэд даргаар ажилладаг.

Ер нь Т.Аюурсайхан болон түүнтэй хамт МАН-ын Шинэчлэл хөгжлийн хороонд хүчин зүтгэдэг залуус карьерын хувьд маш сайн яваа. Өдгөө тэдний дундаас Б.Ганхуяг "Эрдэнэс Тавантолгой"-н захирал, Н.Удаанжаргал "Тавантолгой төмөр зам"-ын захирлаар ажилладаг. Ерөнхийлөгч Х.Баттулгын зарлигаар 2020 онд Б.Ганхуяг Аж үйлдвэрийн гавьяат ажилтан, Н.Удаанжаргал Хөдөлмөрийн баатар цолоор шагнуулсан.

Тэгвэл саяхнаас Т.Аюурсайхан Ерөнхийлөгч асан Х.Баттулгатай тун ойр шадарлах болсон талаар улс төрийн хүрээнд яригдаж байна. Тэрээр Х.Баттулга, С.Ганбаатар, Ж.Батзандан, Г.Уянга нарын удаан дуншиж буй шинэ намын тулгын чулууг тавилцана гэх мэдээлэл байна.

Тэдний шинэ нам Эх орон, тусгаар тогтнолын төлөө нам /ЭОТТТН/ нэртэй юм байна. Энэ нам руу Т.Аюурсайханаас гадна УИХ-ын гишүүн Ц.Даваасүрэн бас явж байгаа гээд яригдаад эхэллээ.

О.Балдан-Очир