Ардчилсан нам цаг үеийн асуудлаар мэдээлэл хийлээ.

АН-ын Ерөнхий нарийн бичгийн дарга Ч.Өнөрбаяр “Монгол Улс, ОХУ хамтарсан зэвсэгт хүчний сургуулилт хийнэ гэсэн мэдээлэл явсан. Гэтэл холбогдох байгууллага нь энэ талаар ямар нэг мэдээлэл хийхгүй байгаа нь анхаарал татсан. Энэ цаг үед ОХУ дайн зарлаж дэлхийд хүчирхийллийг эхлүүлснээрээ олон улсын санкцид орчихсон яваа. Гэтэл үүнтэй зэрэгцээд манай улсад хээрийн сургуулилт хийх гэж байгаа нь буруу ойлголт өгнө. Манай улсын Үндсэн хуульд гадны улсын цэргийг улсдаа байрлуулах, дамжин өнгөрөөхийг хориглодог. Гэтэл энэ үйл явдал хуучны цагт Орос цэргүүд орж ирсэн үеийг санагдуулж байна. Нөгөө талаараа бид дайтагч аль нэг улсын талд байгаа гэдгээ харуулж байна. НҮБ-д түдгэлзсэн байр сууринаасаа буцсан болж хувирна. Энэ цэргийн ажиллагаанд хэн оролцох вэ гэвэл дайныг дэмжигч Беларусь, Узбекстан зэрэг ОХУ-ын халаасны өөрсдийн толгойгүй улсууд байгаа. Ардчилсан Монгол Улс энэ зарчмаар явж болохгүй. ҮАБЗ амьгүй байгааг гайхаж байна.

МАН 100 жилийн ойгоо тэмдэглээд найр наадам болж байна. Энэ ойн наадмаараа Монголын ард түмэнд улсынхаа эдийн засгийг сүйрүүлж том бэлэг барьж байна. 2012-2016 онд Ардчилсан нам засгийн эрх барьж байх хугацаанд дизель түлш 1640 төгрөг байсан. Гэтэл одоо 4000 төгрөг давчихсан. ҮСХ Монгол Улсын инфляцыг 16 хувьд хүрсэн гэж байгаа ч энэ бол худлаа мэдээлэл. Үнийн өсөлтөөс харахад инфляц 20-оос дээш хувьтай байгаа. Монгол банк төгрөгийн тогтвортой байдлыг хангана гэсэн уриатай, гэтэл өнөөдөр төгрөг нь цаас болж хувирлаа.

Монгол Улсын иргэдийг гурав хувааж үзвэл МАН-ын дарга нарыг дагаад наадмын тоосонд дарагдаад гүйж байгаа нэг хэсэг, Монголоос дайжиж байгаа нэг хэсэг, өр зээл тавиад ч болов жижиг дунд үйлдвэрлэл эрхэлж байгаа хүмүүс. Гэтэл банкууд зээл олгохгүй байгаа.  Банк зээл олгохгүй байгаа нь төр засгийн арчаагүй бодлогын улмаас томоохон зээлдэгчид нь бараа бүтээгдэхүүнээ борлуулж чадахаа больсон. Ингээд банкууд зээлээ царцааж, Монголын судсаар гүйдэг цус нь буюу мөнгө нь, банкнууд нь хүндрэлд орсон. ирэх он гараад эдийн засаг элгээрээ хэвтэнэ гэдгийг эдийн засагчид сануулсан. Гэтэл эдийн засаг мэдэхгүй  Ц.Нямдорж Засгийн газрын гал тогоог толгойлоод явж байна. Ийм нөхцөлд эдийн засаг яаж сэргэх вэ. УИХ Засгийн газарт хариуцлага тооц. Үгүй бол УИХ өөрөө тар. Ажлаа хийж чаддаг хүнд боломжийг нь олго” гэв.

Т.Мөнхжаргал