Засгийн газраас гарсан шийдвэрийг танилцуулж байна. Энэ үеэр Гадаад хэргийн сайд Б.Батцэцэг Ерөнхий сайдын Сингапур дахь айлчлалын хүрээнд хийгдсэн ажлын талаар танилцууллаа.

Тэрбээр "Айлчлалын хүрээнд манай улсад тохирсон танилцуулгыг хийж, боломжит үйлчилгээнүүдийг санал болгосон. Яриа хэлэлцээний үеэр Шинэ сэргэлтийн бодлогын хүрээнд эдийн засгийн тэргүүлэх чиглэлд Сингапурын хөрөнгө оруулалттай дэвшилтэт технологийг нэвтрүүлэх, цахим шилжилт, хуримтлалын сан, нийтийн орон сууцжуулалт, төрийн албаны шинэчлэлт, төрийн өмчит компаниудын засаглалыг сайжруулах, ухаалаг нэгдсэн системийг нэвтрүүлэх замаар авто замын түгжрэлийн асуудлыг шийдвэрлэх, хүний нөөцийн чадавхыг бэхжүүлэхэд Сингапур улсын сайн туршлагыг Монгол Улсад нутагшуулах, хамтын ажиллагааг идэвхжүүлэх талаар үр ашигтай ажиллахын тулд тодорхой баримт бичгүүдийг байгуулсан. Үүнд Монгол Улсын онцлогт нийцсэн хуримтлалын нэгдсэн сангийн тогтолцоог бий болгоход дэмжлэг үзүүлэх тухай санамж бичиг, нийтийн орон сууцны хөтөлбөрийн тухай санамж бичиг, цахим шилжилтэд тулгуурласан төрийн албаны шинэчлэл, төслийг хэрэгжүүлэх тухай санамж бичиг, Улаанбаатар хот болон Сингапурын “Эс Ти инженеринг элексроникс” компани хооронд хамтын ажиллагааны санамж бичгийг байгууллаа. Ингээд айлчлалын мөрөөр хэрэгжүүлэх ажлын төлөвлөгөөний эхэнд хамтарсан ажлын хэсэг байгуулж, богино хугацаанд ажил хэрэг болгох тал дээр хоёр талаас хүчин чармайлт гаргаж ажиллахаар боллоо.

Мөн энэ үеэр ОХУ-тай хамтарсан бэлтгэл явуулах талаар сэтгүүлчид тодрууллаа. Тэрбээр "Монгол Улс Батлан хамгаалах салбар олон улсын цэргийн хамтарсан бэлтгэл хийдэг. Энэ бэлтгэл бол жил бүр зохион байгуулагддаг. Жил бүрийн хуваарьт төлөвлөсөн ажлын дагуу хэрэгжүүлж байгаа ажлын нэг. Зэвсэг техникийн хувьд сургуулилтад зориулж авч ирсэн техникийг сургуулилт дууссаны дараа буцаадаг уламжлалтай. Тиймээс шинээр зохиож хэрэгжүүлж байгаа ажил биш" гэв. 

Т.Мөнхжаргал