Маргаашнаас эхлэн гурван өдрийн турш Гэсэр, Жангар, Хан Харангуй тэргүүтэй монгол туульсыг  соёлын өв тээгч-туульчид  хайлах гэж байна.
Монгол тууль бол үгийн урлаг төдийгүй хөгжим аялгуу, туульчийн хайлах, хэлэх уран чадвар, ёс жаяг, зан үйлийг багтаасан нийлмэл цогц урлаг юм.
Монгол аман өвийн хосгүй гайхамшигт төрөл болох Монгол тууль 2009 онд “Яаралтай хамгаалах шаардлагатай соёлын биет бус өвийн ЮНЕСКО-гийн жагсаалт”-д бүртгэгдсэн бөгөөд Монгол улсын засгийн газар туулийг устаж үгүй болохоос сэргийлэн хадгалж хамгаалах, туульч-ардын авъяастныг дэмжин алдаршуулах, хойч үед өвлүүлэх, судалж сурталчлахад чиглэсэн эрх зүй, менежментийг бий болгох иж бүрэн асуудлыг тусгасан “Монгол тууль” үндэсний хөтөлбөрийг 2011 онд баталсан билээ.
Монгол тууль үндэсний хөтөлбөрийг хэрэгжүүлэх алхам болгож Соёл, Спорт, Аялал жуулчлалын яамны Соёл, урлагийн бодлогын хэрэгжилтийг зохицуулах газар, Соёлын өвийн төв, Шинжлэх ухааны академын Хэл зохиолын хүрээлэн хамтран Туульч-ардын авьяастны урын санг өргөжүүлэх, туульчдын залгамж холбоог бэлтгэх, туульчдын ур чадварыг бодитой үнэлж зэрэг дэв олгох, алдаршуулах зорилгоор “Монгол туульчдын урын сан” улсын үзлэгийг маргаашнаас 13-ны хооронд зохион явуулах гэж байна. Туульчдын урын сангийн улсын үзлэг  маргааш 10 цагаас Үндэсний музейд эхэлж 13-ныг дуустал үргэлжлэх юм байна.