Мянганы сорилтын сангийн “Цэвэр агаар” төслийг хэрэгжүүлэх хүрээнд Баянзүрх дүүргийн Засаг дарга Б.Батзориг, мөн хороодын засаг дарга нарыг шалгахаар болжээ. Энэ талаар Нийслэлийн прокурорын орлогч Е.Сагсайгаас тодрууллаа.
    Мянганы сорилтын сангийн “Цэвэр агаар” төслийг хэрэгжүүлэх хүрээнд Баянзүрх дүүргийн Засаг дарга Б.Батзориг, мөн хороодын засаг дарга нарыг шалгахаар болжээ. Энэ талаар Нийслэлийн прокурорын орлогч Е.Сагсайгаас тодрууллаа.

-Цэвэр агаар төслийн хүрээнд БЗД-ийн албан тушаалтнуудыг шалгах гэж байгаа гэсэн. Энэ талаар тодруулахгүй юу?

-Мянганы сорилтын сангийн “Цэвэр агаар” төслийг хэрэгжүүлэх хүрээнд төслийн мөнгийг тодорхой хүмүүс завшсан байж болох хэрэг манайд шалгагдаж байгаа. Мянганы сорилтын сан нь олон салбарт төсөл хэрэгжүүлж байгаа. Түүний нэг нь “Агаарын бохирдлыг бууруулах” төсөл. Энэ байгууллага МУ-д төсөл хэрэгжүүлж эхэлсэнээсээ хойш нийт 47,5 сая ам.долларын өртөг бүхий төсөл хэрэгжүүлсэн байдаг. Харин үүнээс зарим хороо, дүүрэгт тус мөнгийг завшсан хэрэг үйлдэгдсэн. Тиймээс УМБГ-аас мөрдөн байцаалтын ажиллагаа явуулж, Нийслэлийн прокурорын газраас хяналт тавьж байна. Цэвэр агаар төслийн хүрээнд Улаанбаатар хотод оршин сууж байгаа эмзэг давхаргын өрхүүдэд гэрийн дулаалга, дээвэр, туурга, дулаалгаар хангах төслийг хэрэгжүүлдэг юм билээ. Энэ ажлын хүрээнд зарим нэг албан тушаалтнууд голоос нь мөнгө завшсан хэргээр шалгагдаж байна.

-Хэрэгт БЗД-ийн Засаг дарга Б.Батзориг холбоотой гэсэн. Үнэн үү?

-Тийм. Мөн зарим хороодын засаг дарга, “Хас” банкны зарим хүмүүс, хувийн компанийн удирдлагууд, “Сэлбэ дулаан” ХХК-ын захирал Н.Мөнхтогтох нарыг хоорондоо хуйвалдаж, төсвийн хөрөнгөнөөс мөнгө завшсан хэмээн шалгаж байна.

-Мөнгийг ямар аргаар завшсан юм бол?

-БЗД-ийн хороонд оршин сууж буй иргэдийн үнэмлэхийг хэсгийн ахлагч нараар дамжуулан хүмүүсийн иргэний үнэмлэхийг бүгдийг нь хурааж авсан байгаа юм. Тэгээд хурааж авсан иргэний үнэмлэхээ хувилж, хуулбарыг нь аваад хуулбараараа дамжуулан хуурамч баримт бүрдүүлэх замаар “Сэлбэ дулаан” ХХК-д өгсөн байдаг. “Сэлбэ дулаан” ХХК нь Хас банкаар дамжуулж, Мянганы сорилын сангаас ихээхэн хэмжээний мөнгө авсан байна. Тэр нь эмзэг давхаргын айлуудад хүрээгүй, тодорхой албан тушаалтан эрх мэдэлтэй хүмүүсийн үгсэн авсан хэмээн шалгагдаж байна.

-Мөрдөн байцаалтын ажиллагаа хэр байна?

-Мөрдөн байцаалтын ажиллагаа явагдаад удаагүй байна. Гэхдээ зарим нэг баримт тогтоогдоод байгаа.

-Ямар баримт?

-Үндсэндээ 120 гаруй иргэний үнэмлэхээр 66 орчим сая төгрөгийг төслийн мөнгөнөөс завшсан байж болзошгүй. Үргэлжлүүлэн нарийн сайн шалгана. Зөвхөн Баянзүрх дүүргийн нэг хороонд л 750 гаруй иргэнийг төслийн хүрээнд шалгах болж байна.

-Энэ төсөл бол зөвхөн Баянзүрх дүүрэгт явагддаггүй?

-Тийм. Тэгэхээр төсөл явагдаж буй бүх газрыг нарийн шалгана. Мөрдөн байцаалтын ажиллагааг нийслэлийн хэмжээнд явуулна.