Засгийн газрын ээлжит хуралдаанаас гаргасан шийдвэрүүдийг танилцууллаа. 

Монгол Улсын Сангийн сайд Б.Жавхлан "Манай улсад ойрын гурван жилдээ өр зээлийн дефолт үүсэхгүй. Энэ талаар Засгийн газрын гишүүд хэвлэл мэдээллийн хэрэгслээр дамжуулж мэдээллэж байгаа. 2012 оноос өнөөдрийг хүртэлх хугацаанд нийт долоон бонд гаргасан. Үүнээс зөвхөн “Чингис” бонд л төсөл, арга хэмжээнүүдийг санхүүжүүлсэн бол түүний дараагийн бонд төсвийн алдагдлыг нөхөхөд, бусад нь өмнөх бондуудын зээлийг төлөхөд зарцуулсан байна.

Бид өр тавих хэмжээ гэхээсээ илүү өрийн зарцуулалтад илүү анхаарах шаардлагатай.

Эдгээр бондыг эргээд харвал АН засгийн эрх барьж байх үе буюу 2012-2016 онд бонд гаргаж төсөл, арга хэмжээнүүдийг санхүүжүүлсэн. Харин түүнээс хойш буюу 2016 оноос хойш МАН энэ өрийг төлөх гэж өр тавьсан.

Өрийг өрөөр дарлаа гээд байдаг. Манайд тэр хэмжээний бондын өрийг төлөх хэмжээний валютын нөөц байхгүй. Өмнөх засгийн өрийг дарах гэж энэ засгийн газар хамгийн хүнд хэцүүг нь үүрч байна. Гэтэл өр тавьсан хүмүүс нь дефолт болох гэж байна гээд алга ташаад явж байна. Иймд  олон нийтийг турхирч байгаа хүчнээс бид болгоомжлох ёстой.

Тиймээс Засгийн газраас гаргасан бондуудын зарцуулалтыг шалгах ажлын хэсэг байгуулж "Чингис" бондоор санхүүжүүлсэн өр төлбөр хаана, яаж санхүүжилт хийсэн болохыг шалгаж ямар эрсдэлд хүргэсэн болохыг шалгаж ирэх долоо хоногт мэдээллэх болно” гэв.

Т.Мөнхжаргал