БНХАУ-ын Төрийн зөвлөлийн гишүүн, Гадаад хэргийн Ван И-гийн Монгол Улсад хийж буй албан ёсны айлчлал эхлэлээ. БНХАУ-ын Гадаад хэргийн сайдаар 2013 онд томилогдсоноосоо хойш тэрбээр өнөөдөр дөрөв дэх удаагаа манай улсад айлчилж байна.

Гадаад хэргийн дэд сайдаар ажиллаж байхдаа Төрийн айлчлалаар ирж байсныг нь тооцвол БНХАУ-ын Төрийн зөвлөлийн гишүүн, Гадаад хэргийн сайд Ван И ийнхүү тав дахь удаагаа Монгол Улсад албан ажлаар ирж буй.

Нэг. Ноён Ван И 2003 онд БНХАУ-ын Гадаад хэргийн дэд сайд байхдаа төрийн айлчлалаар Монгол Улсад анх айлчилж байв. Энэ үед Монгол Улсын Ерөнхийлөгчөөр Н.Багабанди, Ерөнхий сайдаар Н.Энхбаяр, Гадаад харилцааны сайдаар Л.Эрдэнэчулуун нар ажиллаж байв. Тухайн айлчлалаар хоёр тал Монгол, Хятадын сайн хөршийн, харилцан итгэсэн, түншлэлийн харилцааг тогтоон хөгжүүлэхээр тохиролцсон.

Хоёр. БНХАУ-ын Гадаад хэргийн сайдаар томилогдсоныхоо дараахан 2014 онд БНХАУ-ын дарга Си Зиньпинийн Монгол Улсад хийсэн төрийн айлчлалаар тэрбээр ирж байлаа. Энэ үед Монгол Улсын Ерөнхийлөгчөөр Ц.Элбэгдорж, Ерөнхий сайдаар Н.Алтанхуяг Гадаад харилцааны сайдаар Л.Болд нар ажиллаж байв. Тухайн айлчлалаар Засгийн газар болон хувийн хэвшлийн хооронд нийт 37 баримт бичигт гарын үсэг зурж, хоёр улсын харилцааны түшинг Иж бүрэн стратегийн түншлэлийн түвшинд хүргэх улс төрийн шийдвэрийг зарласан.

Гурав. Монгол Улсад төрийн хоёр айлчлалаар ирж байсан Ван И БНХАУ-ын сайдын хувиар анх удаа айлчлав. Энэ үед Монгол Улсын Ерөнхийлөгчөөр Х.Баттулга, Ерөнхий сайдаар У.Хүрэлсүх, Гадаад харилцааны сайдаар Д.Цогтбаатар нар ажиллаж байжээ. Тухайн айлчлалын хүрээнд  Монгол Улс, БНХАУ-ын хооронд тогтоосон Иж бүрэн стратегийн түншлэлийн харилцааг бэхжүүлэх, харилцан ашигтай хамтын ажиллагааг тэргүүлэх салбаруудад идэвхжүүлэн гүнзгийрүүлэх, хамтын ажиллагааны хүрсэн тохиролцоог урагшлуулах, олон улсын болон бүс нутгийн харилцааны асуудлыг хэлэлцсэн.

Дөрөв. Монгол Улсад БНХАУ-ын Гадаад хэргийн сайдын хувиар 2020 онд хоёр дахь удаагаа айлчлав. Энэ үед Монгол Улсын Ерөнхийлөгчөөр Х.Баттулга, Ерөнхий сайдаар У.Хүрэлсүх, Гадаад харилцааны сайдаар Н.Энхтайван нар ажиллаж байлаа. Тухайн айлчлалын хүрээнд хоёр улсын Иж бүрэн стратегийн түншлэлийн харилцааг бэхжүүлэх, харилцан ойлголцол, улс төрийн итгэлцлийг гүнзгийрүүлэх, бүх салбарын хамтын ажиллагааг урагшлуулах болон бүс нутаг, олон улсын харилцааны холбогдолтой өргөн хүрээний асуудлыг хэлэлцсэн.

Тав. БНХАУ-ын Төрийн зөвлөлийн гишүүн, Гадаад хэргийн сайд Ван И-гийн Монгол Улсад хийх албан ёсны айлчлал үргэлжилж байна. Тэрбээр яг одоо Монгол Улсын Гадаад харилцааны сайд Б.Батцэцэгтэй хэлэлцээ хийж байна. Ноён Ван И-гийн энэ удаагийн айлчлалаар Эрдэнэбүрэнгийн УЦС, Багануурын цахилгаан станц, хилийн боомтуудын холбох цэг, төв банкуудын хоорон дахь своп хэлцэл зэргийг ярилцана хэмээх хүлээлт буй. Ван И-гийн айлчлалын богц задарч байна.

1. Гашуунсухайт-Ганцмод боомтыг төмөр замаар холбох асуудлыг эцэслэн тохиролцож, хятадын талд урт хугацаанд нүүрс тогтвортой нийлүүлэх гэрээ байгуулахаар болов.
2. Эрдэнэбүрэнгийн УЦС-ын төслийн бүтээн байгуулалтыг хоёр тал эрчимжүүлэхээр тохиролцов.
3. Ханги-Мандал боомтыг төмөр замаар холбох асуудлаарх манай талын хүсэлтийг хятадын тал анхааралдаа авч, үргэлжлүүлэн ажиллахаар болов.
4. Хүмүүнлэгийн салбарын хамтын ажиллагааны хүрээнд БНХАУ-д суралцаж буй оюутнуудыг үргэлжлүүлэн танхимаар хичээллүүлэхээр тохиролцож, иргэдийн харилцан зорчих хөдөлгөөнийг хялбаршуулж сэргээхээр ярилцав.
5. Төрийн тэргүүн нар утсаар ярих үеэр тохиролцсон цөлжилт, шороон шуургатай тэмцэх, байгаль орчныг хамгаалах чиглэлийн хамтын ажиллагааг өргөжүүлэх, “Тэрбум мод” үндэсний хөтөлбөрийн хүрээнд төсөл хөтөлбөр хамтран хэрэгжүүлэхээр тохиролцов.

Д.Батчулуун