НҮБ-ийн Ерөнхий нарийн бичгийн дарга Антонио Гутеррешийн айлчлал үргэлжилж байна. Энэ үеэр Гадаад харилцааны сайд Б.Батцэцэгтэй хэлэлцээ хийж, мэдээлэл өгөв.

Гадаад харилцааны сайд Б.Батцэцэг "НҮБ-ийн Ерөнхий нарийн бичгийн дарга Антонио Гутеррешийн айлчлал нь Монгол Улс НҮБ-д элссэний 60 жилийн ой, Монгол Улс энхийг сахиулах үйл ажиллагаанд оролцож эхэлсний 20 жилийн ой, цөмийн зэвсэггүй бүс нутаг хэмээн зарласны 30 жилийн түүхэн ойтой давхцаж байгаа нь олон улсын энх тайван, аюулгүй байдлыг бэхжүүлэхэд манай улсын оруулж буй хувь нэмрийг өндрөөр үнэлж байгаагийн илэрхийлэл юм.

Монгол Улс хүний эрхийг дээдэлсэн, эмэгтэйчүүдийн ялгаварлан гадуурхалтаас ангид, тэгш эрхтэй байх ёстой гэж үздэг ардчилсан улс. Тийм ч утгаараа манай улс НҮБ-ийн аюулгүйн зөвлөлийн “Эмэгтэйчүүд, энх тайван, аюулгүй байдлын тухай 1325 дугаар тогтоолын дагуу энхийг сахиулах ажиллагаанд оролцож буй эмэгтэй албан хаагчдын тоог 15 хувьд хүргэх уриалгыг дэмжин 2027 он гэхэд энэхүү зорилгод хүрэх бодлого баримталж байна. Монгол Улс 1992 онд нутаг дэвсгэрээ цөмийн зэвсэггүй бүс нутаг хэмээн зарласан. Олон улсын энх тайван, аюулгүй байдал хурцадсан өнөө цагт цөмийн зэвсэггүй статусын ач холбогдол улам бүр нэмэгдэж байгааг онцлон дурдмаар байна.

Түүнчлэн Монгол Улсын Ерөнхийлөгч У.Хүрэлсүхийн санаачилсан "Тэрбум мод" хөтөлбөр нь дэлхийн дулаарал, цөлжилтийн эсрэг чухал ач холбогдолтой хэмээн үзээд Ерөнхий нарийн бичгийн дарга Антонио Гутерреш өнөөдөр Үндэсний цэцэрлэгт хүрээлэнд мод тарих арга хэмжээнд оролцоно.

Монгол Улс Ерөнхий нарийн бичгийн дарга Антонио Гутеррешийн “Бидний нийтлэг зорилго” илтгэлд дэвшүүлсэн зорилт, арга хэмжээ нь цаг үеэ олсон, хөгжлийн зорилтот хөтөлбөрүүдийг эрчимжүүлэхэд чиглэсэн олон талт үйл ажиллааг бэхжүүлэхэд чухал ач холбогдолтой гэж үздэг. Манай улсын санаачилсан “Далайд гарцгүй хөгжиж буй орнуудын олон улсын судалгааны төв”-ийг Тогтвортой хөгжлийн 2030 хөтөлбөрийг хэрэгжүүлэхэд үр дүнтэй” гэв.

Т.Мөнхжаргал