НҮБ-ийн Ерөнхий нарийн бичгийн дарга Антонио Гутерреш айлчлалын үеэрээ Үндэсний цэцэрлэгт хүрээлэнд мод тарих арга хэмжээнд оролцож өөрийн биеэр мод тарьлаа. 

Антонио Гутерреш “Мод тарих арга хэмжээг нээж үг хэлэхийн өмнө энд хүрэлцэн ирсэн энхийг сахиулагчид та бүхэнд хүндэтгэл үзүүлэхийг хүсч байна. Дэлхийн хамгийн халуун цэгүүдэд, хүнд байдалтай байгаа улс орнуудад Монголыг цэрэг энхийг сахиулах үйл ажиллагаанд оролцож тэнд байгаа энгийн иргэд, эмэгтэйчүүд, эмзэг бүлгийн хүмүүст бүхий л талын дэмжлэг, туслалцаа үзүүлж ирсэн та бүхний үйл хэргийг өндрөөр үнэлж байгаагаа илэрхийлье. Бид байгаль орчноо бохирдуулж, байгалийн баялгийг ашиглаж, хойч үедээ байгаль дэлхийгээ хэвээр нь хүлээлгэж өгч чадсангүй. Бид үүний үр дагаврыг уур амьсгалын өөрчлөлтийн сөрөг нөлөөлөл, агаар , хөрсний бохирдол, хатуу хог хаягдлын зохисгүй үйл ажиллагааны улмаас амсаж байна. Тиймээс энэ бүгдийг зогсоож байгаль орчноо хэвээр нь үлдээхэд туслахыг уриалж байна.

Намайг бага байхад өвөө маань жижиг оливийн модны дэргэд очоод “Энэ модыг чамайг төрөхөд тарьж байсан юм” гэж хэлж байсан. Оливийн мод маш удаан насалдаг. Миний төрөлх нутаг Португалд 1000 орчим настай оливийн мод бий. Тийм ч учраас миний амьдралыг илэрхийлсэн мод эх оронд маань ургаж байгаад баяртай байдаг" хэмээв. 

Т.Мөнхжаргал