БШУЯ-наас цэцэрлэгийн элсэлт, бүртгэл, хүртээмжийн асуудлаар мэдээлэл хийлээ. Энэ үеэр БШУ-ны сайд Л.Энх-Амгалан мэдээлэл өглөө.
Тэрбээр “Өнгөрсөн хавар УИХ төсөвийн тодотгол хийж, төсвийн хэмнэлтийг зарласан. Төсвийн хэмнэлтээс 100 орчим тэрбум төгрөгийг цэцэрлэгийн хүртээмжийг нэмэгдүүлэх хөрөнгө оруулалтыг баталсан. Нийслэлийн цэцэрлэгийн хүртээмжийг нэмэгдүүлэх чиглэлээр УИХ тогтоол баталсан. Бид сүүлийн хоёр сар Дүүргийн засаг дарга, дүүргийн хороодын дарга нартай ажилласны үр дүн өнөөдөр гарч байна. Монгол Улсын хэмжээнд 303 мянган цэцэрлэгийн насны хүүхэд байдаг.
- Нийслэлийн хэмжээнд 2-5 настай хүн амын тоо 141 мянга гаруй,
- Нийслэлийн цэцэрлэгүүдийн суурилагдсан хүчин чадал 102 мянга гаруй,
- 2022-2023 онд сургах боломжтой хүүхдийн тоо 106 мянга гаруй,
- Хамрагдахгүй үлдэх эрсдэлтэй хүүхдийн тоо 34 мянга гаруй байна.
Тухайлбал, Баянзүрх дүүрэгт хамгийн олон буюу 8639, Сүхбаатар дүүрэгт 7598 хүүхэд цэцэрлэгийн гадна үлдэх эрсэлдтэй байна.
Мөн насаар нь ангилаад үзвэл:
- 2 настай 23780 хүүхэд
- 3 настай 3572 хүүхэд
- 4 настай 3621 хүүхэд
- 5 настай 3513 хүүхэд цэцэрлэгийн гадна үлдэх эрсдэлтэй байна.
Сүхбаатар, Чингэлтэй, Багахангай, Багануур дүүргүүд есдүгээр сарын 1, аравдугаар сарын 15 гэхэд бүх хүүхдийг 100 хувь цэцэрлэгт хамруулах боломж бүрдсэн.
Маргаашнаас эхлэн цэцэрлэгийн хүсэлт хүлээн авна. Хүүхдээ цэцэрлэгт хамруулахын тулд сугалаанд хамрагддаг тогтолцоо байсан. Өнөөдөр бид сугалааны цэцэрлэгийн тогтолцоог халж байна. Энэ оны есдүгээр сарын 1-ний өдрийн байдлаар 26643 хүүхэд, 12 дугаар сарын 31-ний өдрийн байдлаар 7755 хүүхэд буюу нийт 34398 хүүхдийг цэцэрлэгт хамруулах боломж бүрдсэн" гэв.
Д.Батчулуун
