Манай улс мөнхийн хоёрхон хөрштэй. Хоёр хөршийн Гадаад хэргийн сайд нар Монгол Улсын Гадаад харилцааны сайд Б.Батцэцэгийн урилгаар нэг сарын гаруйхны зайтай Монгол Улсад айлчиллаа.

Айлчлалын үеэр ОХУ-ын Гадаад хэргийн сайд С.В.Лавров “ОХУ, Монгол улсын хооронд сайн хөршийн харилцаа олон чиглэлээр хөгжиж байна. 2019 оны есдүгээр сард Улаанбаатар хотноо гарын үсэг зурсан Найрсаг харилцаа, иж бүрэн стратегийн түншлэлийн тухай хэлэлцээрийн дагуу хоёр талын хамтын ажиллагааг улам илүү өргөжүүлэх хүсэлтэй гэдэгт санал нэгдлээ” хэмээн хэлж байв.

Мөн БНХАУ-ын Гадаад хэргийн сайд Ван и “Хятад Монгол улс бол хувь заяагаар холбогдсон. Тийм учраас сайн харш, бэрхшээлийг хамтран даван туулах сайн хөрш, сайн анд юм. Талууд бие биеийн тусгаар тогтнол нутаг дэвсгэрийн бүрэн бүтэн байдлыг харилцан хүндэтгэн гэдгээ дахин нотолсон. Бие биеийн язгуур эрх ашгийг харилцан хүндэтгэж байна” хэмээн хэлсэн.

2022 оны долоодугаар сарын 5-ны өдөр ОХУ-ын Гадаад хэргийн сайд С.В.Лавров Монгол Улсад айлчлав.

• Хоёр улсын харилцаа цар тахалын өмнөх байдалдаа эргэн орж, төмөр зам, агаарын харилцааг сэргээснээр иргэдийн харилцан зорчих урсгал болон худалдааны хэмжээ мэдэгдэхүйц нэмэгдэв.
• Худалдааны хэмжээ 2021 онд хоёр тэрбум ам.доллар давсан. Үүнийг улам сайжруулах бүрэн боломтой гэж үзэв.
• ОХУаас БНХАУ руу байгалийн хий нийлүүлэх хоолойг Монгол Улсын нутаг дэвсгэрээр дамжуулан барих төслийн ажил хуваарийн дагуу хийгдэж байна.
• Төмөр замаар манай улсын баруун болон зүүн талаар хоёр хөрштэйгөө холбогдох коридоруудын асуудлыг ярилцав.
• Эрчим хүчний салбарт эрчим хүчний объектуудын шинэчлэл, өргөтгөлийн хамтарсан төслүүдийг үргэлжлүүлэн хэрэгжүүлээр болов.

2022 оны наймдугаар сарын 7-нд БНХАУ-ын Гадаад хэргийн сайд Ван И Монгол Улсад айлчлав.

• ГашуунсухайтГанцмод боомтыг төмөр замаар холбох асуудлыг эцэслэн тохиролцож, хятадын талд урт хугацаанд нүүрс тогтвортой нийлүүлэх гэрээ байгуулахаар болов.
• Эрдэнэбүрэнгийн УЦСын төслийн бүтээн байгуулалтыг хоёр тал эрчимжүүлэхээр тохиролцов.
• ХангиМандал боомтыг төмөр замаар холбох асуудлаарх манай талын хүсэлтийг хятадын тал анхааралдаа авч, үргэлжлүүлэн ажиллахаар болов.
• Хүмүүнлэгийн салбарын хамтын ажиллагааны хүрээнд БНХАУд суралцаж буй оюутнуудыг үргэлжлүүлэн танхимаар хичээллүүлэхээр тохиролцож, иргэдийн харилцан зорчих хөдөлгөөнийг хялбаршуулж сэргээхээр ярилцав.
• Төрийн тэргүүн нар утсаар ярих үеэр тохиролцсон цөлжилт, шороон шуургатай тэмцэх, байгаль орчныг хамгаалах чиглэлийн хамтын ажиллагааг өргөжүүлэх, “Тэрбум мод” үндэсний хөтөлбөрийн хүрээнд төсөл хөтөлбөр хамтран хэрэгжүүлэхээр тохиролцов.

Д.Батчулуун