Засгийн газрын хуралдаанаас гаргасан шийдвэрийг танилцуулж байна. Энэ үеэр Барилга хот байгуулалтын сайд Мөнхбаатар мэдээлэл өглөө.

Тэрбээр "Монгол Улсын мөрийн хөтөлбөрт тусгагдсан нэг том ажил бол шинэ хотууд барих юм. Улаанбаатар хотын төвлөрлийг сааруулах чиглэлээр хот төлөвлөлтүүдийг хийж байна. Монгол улс 1980 оноос хойш шинэ хот бариагүй. Хамгийн сүүлд Багануур хотыг 40 жилийн өмнө барьсан. 40 жилийн дараа шинэ хот барих ажлыг эхлүүлэн ажиллаж байна. Хөшгийн хөндийд онгоцны буудал ашиглалтад орсон. Тэр хөндийд байрлах Шинэ зуун мод, Зуун мод болон ирээдүйд бий болох Майдар хотуудын төлөвлөлтийг цогцоор нь авч үзсэн. Ингээд Хөшгийн хөндийн шинэчилсэн төлөвлөлтийг батлуулсан. Төлөвлөлт батлагдсан үеэс эхлээд шугам сүлжээний ажлын зураг, инженерийн дэд бүтцийн эх үүсвэрийг хийж эхэлсэн. Мөн цэвэрлэх байгууламж, усан сан, дулааны шийдэл зэргийг төлөвлөлттэйгөө уялдуулан ажлын зургуудыг хийсэн. Эхний ээлжийн инженерийн дэд бүтэц 498 тэрбум төгрөгийн хөрөнгө оруулалтыг гаргаж ирсэн.

Энэ оны гуравдугаар сард Хөшигийн хөндий рүү нүүлгэх асуудлыг Засгийн газрын хуралдаанд танилцуулсан. Тэгвэл Засгийн газрын өнөөдрийн хуралдаанаар төр, захиргааны зарим байгууллагыг Хөшигийн хөндий рүү нүүлгэх тогтоол албажин батлагдлаа. Маргааш тэр байгууллага явна гэж хэлж болохгүй. Олон төлөвлөлтийг үе шаттай хийх ёстой. Хүний нүдэнд харагдахгүй газар доорх ажлуудыг хийнэ.

Мөн Шинэ зуун мод” хавийн инженерийн дэд бүтцийн ажлыг эхлүүлэхээр боллоо” гэв.

Д.Батчулуун