НИТХ-ын Тэргүүлэгчдийн хуралдаан боллоо. Хуралдаанд “Гэр хорооллын хог хаягдлыг цуглуулж, тээвэрлэх, эрхийн төсөл сонгон шалгаруулах, санхүүжүүлэх журам” Тогтоолын төслийг Улаанбаатар хотын Ерөнхий менежер Ч.Бат танилцуулж хэлэлцүүллээ.Нийслэлийн гэр хорооллын хог хаягдлыг зайлуулахдаа орон сууцны хорооллын оршин суугчдаас хураасан мөнгөний тодорхой хэсгийг зарцуулдаг юм байна. Нэг үгээр хэлбэл гэр хорооллын өрхүүдийн хураалгасан хогийн мөнгө нь зөөж тээвэрлэхэд хүрдэггүй ажээ. Энэхүү нөхцөл байдлыг өөрчлөх, шинэчлэх зорилгоор НИТХТ-ийн хуралдаанд Улаанбаатар хотын Захирагчын ажлын алба дээрх төслийг оруулж хэлэлцүүлж байгаа гэж хэллээ. Төслөөр нийслэлийн гэр хорооллын хогийг 14 цэгт төвлөрүүлэн тээвэрлэх үйл ажиллагааг зохион байгуулах эрхийг сонгон шалгаруулалтаар тодруулж, санхүүжилтийг нь хийнэ. Тэргүүлэгчид төслийг хэлэлцээд тогтоолыг баталлаа.
“Улаанбаатар хотын захирагчийн тусгайлсан нутаг дэвсгэр дэх Ажлын алба” нийслэлийн төсөвт үйлдвэрийн газар байгуулах тухай Тогтоолын төслийг Нийслэлийн Засаг даргын Тамгын газрын дарга Ё. Гэрэлчулуун танилцуулж хэлэлцүүллээ. Тэргүүлэгчид уг төслийг боловсруулсан ажлын хэсгийнхнээс асуулт асууж тодруулж байлаа. Тухайлбал, төлөөлөгч Д.Батбаяр “Ажлын давхардал гарах уу. Дүүргүүдээс санал авсан уу” хэмээн асуулаа. Түүний энэ асуултад ажлын хэсгийн ахлагч Ё. Гэрэлчулуун “Улаанбаатар хотын Захирагчийн хэрэгжүүлж байгаа бодлого, шийдвэр иргэдэд хүрэхдээ тааруухан байна гэж үзээд энэ бүтцийг бий болгож байгаа юм. Иргэдтэй уулзаж явахад энэ талаар маш их яригддаг. Дүүрэг, хорооны Засаг дарга бол нийслэлийн Засаг даргын бодлого үйл ажиллагааг хэрэгжүүлээд явдаг онцлогтой. Энд ажлын ямар нэг давхардал гарахгүй гэж үзсэн. Засаг даргын хэрэгжүүлэх мөрийн хөтөлбөрт гэр хорооллыг дахин төлөвлөж, дэд бүтцэд холбох зорилт дэвшүүлэгдэж байгаа. Энэ ажлыг газар дээр нь зохион байгуулж хэрэгжүүлэх гол бүтэц маань энэ. Тиймээс Улаанбаатар хотын алслагдсан гэр хороололд хотын захирагч Ажлын албатай болж байгаа юм” гэсэн тайлбар өглөө. Төслөөр гэр хороооллын хүн амын тоог харгалзан үзэж Захирагчийн ажлын албыг зохион байгуулахаар тусгасан байсан боловч Тэргүүлэгч Д.Бадарсан дүүргүүдийн нутаг дэвсгэрийн хилийн цэсийг харгалзан үзэж ажлын албыг байгуулах ёстой гэсэн санал гаргаж санал хураалгалаа. Тэргүүлэгчдийн олонхи нь уг саналыг дэмжиж хоёр дүүргийн хороодын дундаас бүрдсэн захирагчийн ажлын албыг нэг талд нь багтааж, тодорой дүүргийн нутаг дэвсгэрт багтаж зохион байгуулахаар боллоо. Гэхдээ төлийн “тусгайлсан ажлын алба” гэсэн нэр томъёог “алслагдсан гэр хороолол дахь Ажлын алба” гэж өөрчлөв. Нийслэлийн хамгийн олон хүн амтай Сонгинохайрхан дүүрэгт Улаанбатар хотын захирагчийн ажлын алба гурав байхаар болж байна. Улаанбаатар хотын алслагдсан гэр хорооллын ажлын албыг иргэдийн хэлж заншсанаар Дэнжийн мянга, Баянхошуу, Толгойт, Хайлааст, Шар хад хэмээн нэрлэх юм байна. Энэ удаагийн хуралдаанаар “Нийслэлийн төр, хувийн хэвшлийн түншлэлийн хамтын ажиллагааны зөвлөл байгуулах тухай тогтоолыг баталж, шагналд тодорхойлогдсон 200 гаруй хүний нэрийг тогтоол гарган Ерөнхийлөгчийн Тамгын газарт хүргүүлэхээр шийдвэрлэлээ.
