Ардчилсан намын бүлэн мэдээлэл хийлээ. Энэ үеэр АН-ын Хуулийн зөвлөх О.Баасанхүү мэдээлэл өгөв.

Тэрбээр "Миний бие Монгол УЛсын үндсэн хуулийн цэцэд иргэнийхээ хувьд гомдол гаргасан. УИХ-ын тухай хуулийн 31.12-т орсон нэмэлт өөрчлөлт нь УИХ-ын зохих заалтуудыг зөрчсөн байна гэдэг асуудлаар гомдол гаргасан. Энэ заалтад бүлгийн даргатай холбоотой асуудлыг хуульчилсан байдаг. Би найман жил УИХ-д сууж байсан. Мэргэжлийн мэтгэлцээн, мэргэжлийн байр суурь илэрхийлдэг байсан. Харамсалтай нь, Мөнхбаатар, Сүхбаатар, Энхбаяр зэрэг хуульчид мэргэжлийн асуудал дээр мэргэжлийн дуу хоолой гаргаагүй. Үүнд харамсаж байна. Шалтгаан нь өнөөдөр ардчилсан намын бүлэг даргатай байх уу, үгүй юу гэдэг нь мэргэжлийн хүний хувьд ямар ч хамаагүй асуудал.

Монгол Улсын Үндсэн хуульд тодорхой заачихсан байгаа. Бүлэг гэдэг намын үзэмжээр байгуулагддаг. Бүлэгтэй бол бүлгээрээ дамжуулъя. Бүлэггүй бол гишүүнээрээ дамжуулъя. Монгол Улсын Үндсэн хуулийн 19 дүгээр зүйлд заасны дагуу улс даяар үйл ажиллагаа явуулах эрх үүргээ биелүүлэх гэсэн заалтыг байхгүй болгосон. Өөрөөр хэлбэл, нэг байнгын хороо шиг, нэг харьяа байгууллага шиг байдлаар бүтэц өөрчилсөн хууль гаргасан. Энэ бол маш аймшигтай. Ганцхан үг, өгүүлбэр нь энэ парламентыг тогтолцоог бүхлээр нь өөрчилж байгаатай адил үйл явдал болж байна.

Монгол Улс мөнх. Монголын төр мөнх. Олон зуун жил парламент үе солигдоод, нам солигдоод явах байх. Харин хууль хуулиараа явна. Энэ хуулийг, энэ заалтыг гаргаснаар намын дотоод үйл ажиллагаанд оролцох эрх үүсжээ. Бүлгийн нийт гишүүд гэж заасан байгаа. Тухайн намын бүлгийн нийт гишүүд гэж бичээгүй. Тухайлбал, Нийт гишүүд гэдэг нь МАН-ын бүлэг АН-ын бүлгийн асуудлыг шийдэх зэрэг үндсэн хуульд огт байхгүй заалт оруулж байна. Энэ асуудлаар гомдол гаргасан. Үндсэн хууль сонирхдог бүх хүн санал ирүүлээсэй хэмээн хүсэж байна. Өнөөдөр бүх зүйл эмх замбараагүй болсон” гэв.

Д.Батчулуун