УИХ-ын эмэгтэй гишүүдийн төлөөлөл Аж ахуй эрхлэгч эмэгтэйчүүдийн эдийн засаг дахь оролцоог нэмэгдүүлэх тухай хуулийн төслийн талаар мэдээлж байна. Энэ үеэр УИХ-ын гишүүн Д.Сарангэрэл мэдээлэл өглөө.

Тэрбээр “2011 онд Жендерийн тэгш байдлыг хангах тухай хууль батлагдсан. Батлагдаад арав гаруй жил боллоо. Жендерийн үндэсний хороо энэ хуулийн хэрэгжилтийн талаар үнэлгээ хийлгэсэн. Энэ үнэлгээнд “Монгол улсын бизнесийн орчин сайжирсан ч эмэгтэй бизнес эрхлэгчийн хувьд эдийн засгийн оролцоо боломж хийсэн гэх дүгнэлт гаргасан. Өөрөөр хэлбэл, Монгол улс эмэгтэй бизнес эрхлэгчдийг дэмжих хууль байхгүй байна.

Дэлхийн 35 оронд эмэгтэй ААН, бизнес эрхлэгч гэсэн хууль үйлчилж байна. Үндэсний статистикийн хорооноос 2020 онд хийсэн судалгааны тайланд ажиллах хүчнээс гадуур байгаа нийт хүн амын 39,3 хувь нь эрэгтэй, 60,7 хувь нь эмэгтэй хүн байна. Эмэгтэйчүүд эрэгтэйчүүдээс хөлсгүй хөдөлмөрт 2,6 дахин илүү хугацааг буюу 273 минут зарцуулдаг. Энэ 273 минутад хүүхдээ харах, ахмадуудаа асрах зэрэг олон асуудал бий.

Ийм шалтгаануудаар эмэгтэйчүүд хөдөлмөрийн зах зээлээс шахагдан гарч байна. Хүүхдүүдээ цэцэрлэгт явуулдаг, ахмадуудыг асардаг болсноор хөдөлмөр хамгаалах боломж бүрдэнэ. Мөн хөдөлмөрийн зах зээлээс шахагдсан тул эмэгтэйчүүдийн орлого бага, хөрөнгө эзэмшлийн хэмжээ асар бага. Тиймээс банк найдваргүй зээлдэгч гэж үздэг. Эмэгтэйчүүд нөхөртэйгөө хөрөнгө булаацалдаж буй асуудал биш” гэв.

Д.Батчулуун