МАН-ын бүлэг хуралдлаа. Хуралдааны тухай МАН-ын дарга Д.Тогтохсүрэн мэдээлэл өглөө.

Тэрбээр “Бүлгээр нэг асуудал хэлэлцлээ. Үндсэн хуулийн цэц 2022 оны наймдугаар сарын 15-ны өдөр 02 дугаар тогтоол гаргасан. Энэ тогтоолтой холбогдуулж үүсэж буй нөхцөл байдлын талаар хэлэлцсэн.  

Үндсэн хуулийн цэц их суудлын хуралдаанаараа Үндсэн хуулийн 39.1 дүгээр заалтын хоёр дах өгүүлбэр буюу Ерөнхий сайд, УИХ-ын дөрвөн гишүүн Засгийн газрын гишүүн байж болно гэсэн заалтыг 1992 оны Үндсэн хуулийн үзэл баримтлалд нийцэхгүй байна гэж үзсэн. Иймээс хүчингүй болгох шийдвэр гаргасан. Үүнд УИХ авч хэлэлцэх, ямар нэг байдлаар нөлөөлөх боломжгүй. Гэхдээ үүнтэй холбогдуулсан цаашдын эрхзүйн орчныг яаж явах вэ гэдэг асуудал ярихгүй байж болохгүй. Тийм учраас МАН хуралдлаа.

Бүлгийн зүгээс хоёр чиглэлийн шийд гаргаж байна.

• Нэгдүгээрт, Цэцийн шийдвэр эцсийн шийдвэр ч гэсэн уг шийдвэртэй холбоотой цэцээс тодруулга авах хэрэгтэй байна гэж үзсэн.
• Хоёрдугаарт, Цэцийн эцсийн шийдвэр гарчихсан учир Үндсэн хуулийн өөрчлөлтийн асуудлыг ярихаас өөр аргагүй болж байна. Үндсэн хуулийн өөрчлөлтийг УИХ-ын гишүүдийн 57 хувиас дээш саналтайгаар өөрчилдөг. Тиймээс энэ агуулгыг бид ямар ч тохиолдолд баримталж явах ёстой гэсэн хоёр чиглэлийн шийд гаргалаа.

Ээлжит бус чуулганы үед намын бүлэг байнга хуралдана” гэв.

Д.Батчулуун