Монгол, Японы дипломат харилцаа тогтоосны 50 жилийн ойд зориулсан “Их хуралдай” симпозиум болж байна. Энэ үеэр Гадаад харилцааны сайд Б.Батцэцэг үг хэлж, мэндчилгээ дэвшүүллээ.

Тэрбээр "Монгол Японы найрамдлын нийгэмлэгүүдээс санаачлан зохион байгуулж буй Их хуралдайд хүрэлцэн ирсэн та бүхэнд талархал илэрхийлж Монгол Японы хооронд дипломат харилцаа тогтоосны 50 жилийн ойн баярын мэндийг өргөн дэвшүүлье. 50 жилийн тэртээ 1972 оны хоёрдугаар сарын 24-ны өдөр БНМАУ, Япон улс хооронд дипломат харилцаа тогтоох тухай нот бичиг солилцсоноор манай хоёр улсын албан ёсны харилцаа хамтын ажиллагаа эхэлсэн түүхтэй. Тэр цагаас хойш 50 жилийн хугацаанд Монгол Японы хамтын ажиллагаа өргөжин хөгжиж, өнөөдөр Япон улс манай гуравдагч хөрш, бүм нутаг дахь стратегийн найдвартай түнш болсныг онцлон тэмдэглэхэд таатай байна.

Нийтлэг үнэт зүйлстэй манай хоёр улс хоёрын талын хүрээнд төдийгүй олон улс, бүс нутгийн тавцанд нягт хамтран ажиллаж байна. Хоёр улсын төр засаг, найрамдал, олон нийтийн байгууллагууд, хоёр улсын солилцоо, хамтын ажиллагаа жил ирэх тусам идэвхжин хөгжсөөр ирсэн.

Япон улсын засгийн газар, ард түмэн Монгол орны ардчилсан хөгжлийг эхнээс нь тууштай дэмжиж, нийгэм эдийн засгийн бүхий л талбарт Япон хүний халуун сэтгэл шингэсэн дэмжлэг туслалцаа хүрч, тэр ч хэрээр хоёр улсын найрамдал, харилцан хүндэтгэл гүнзгийрч ирсэн билээ. Энэ ялдамд Монгол улсын өнөөгийн нөхцөл байдалд үнэтэй хувь нэмэр оруулсан Японы Засгийн газар, ард түмэнд гүн хүндэтгэл үзүүлж байгааг хүлээн авна уу.

Мөн Монгол улсын ардчилсан нийгэмлэгийн олон улсад уриалж, хошуучлан манлайлахын сацуу Монгол Улсад хөгжингүй улс орнуудын удирдагчдаас хамгийн анх хөл тавьж айлчилсан Японы ерөнхий сайд Кайфү Тошики агсныг энэ мөчид дурсан хүндэтгэж байна. Монгол Японы тулгын гурван чулууг тавилцсан, өнөөгийн хоёр улсын харилцааг бүтээлцсэн хүн бүрд гүн талархал илэрхийлье.

Монгол Японы харилцаа 1970 оноос хойш соёл, боловсрол, хүмүүнлэг зэрэг бүхий л салбарт цар хүрээгээ тэлж, амжилттай урагшлан хөгжиж байна. Монгол Улсын хувьд анхны чөлөөт худалдааны гэрээ болох эдийн засгийн түншлэлийн хэлэлцээрийг 2016 онд байгуулж, одоо хэрэгжиж байна.

Өнгөрсөн тавдугаар сард бид 50 жилийн ойн хүрээнд Япон улсын Гадаад хэргийн сайд Хаяши Ёшимаса албан ёсоор айлчилж, хоёр улсын харилцааг ирэх 50 жилд хөгжүүлэх хэтийн төлөв, Монгол Японы стратегийн түншлэлийн ирээдүйн чигийг тодорхойлоход цаашид нягт хамтран ажиллахаар тохиролцсон билээ.

Монгол Японы найрамдлын хөдөлгөөн 1950-аад оны сүүлчээр үүсэн хөгжсөн бөгөөд энэ хугацаанд Монгол Японы олон нийт бие биеэ таньж мэдэх, харилцан ойлгох, хамтран ажиллахад үнэлж баршгүй хувь нэмэр оруулсныг тэмдэглэхэд таатай байна. Ингээд Найрамдлын хөдөлгөөнд амжилттай оролцож, түүхийг бүтээлцэж ирсэн Монгол Японы анд нөхөд та бүхэндээ дахин чин сэтгэлийн талархал дэвшүүлье. Монгол Японы стратегийн түншлэлийн харилцаа манай хоёр улсын хөгжил дэвшил төдийгүй бүс нутгийн энх тайван, хамтын ажиллагаанд үнэтэй хувь нэмэр оруулна гэдэгт итгэлтэй байна. Өнгөрсөн 50 жилийн хугацаанд хүрсэн ололт амжилтаа ирэх 50 жилд улам бататган, хоёр орны ард түмний найрамдал нөхөрлөлийг гүнзгийрүүлэн бэхжүүлэхийн өлзийтэй ерөөлийг өргөн дэвшүүлье.