Монгол Улсын Их Хурлын чуулганы хуралдааны дэгийн тухай хууль , Үндсэн хуульд нэмэлт, өөрчлөлт оруулах журмын тухай хууль, Монгол Улсын Үндсэн хуулийн цэцийн тухай хууль, Үндсэн хуулийн цэцээр аливаа асуудал хэлэлцэж шийдвэрлэх журмын тухай хуульд зарим нэмэлт өөрчлөлт оруулах төслийг боловсруулж УИХ-ын дарга Г.Занданшатарт өргөн барьлаа.

Энэ хуулийн төслийг УИХ-ын гишүүн, Төрийн байгуулалтын байнгын хорооны гишүүн Н.Энхболд нарын долоон гишүүн санаачилж, танилцууллаа.

Монгол Улсын Үндсэн хуулийн цэцийн их суудлын хуралдаанаар Үндсэн хуулийн Гучин есдүгээр зүйлийн 1 дэх хэсгийн “Ерөнхий сайд болон Засгийн газрын дөрвөөс илүүгүй гишүүн УИХ-ын гишүүний албан тушаалыг хавсарч болно” гэсэн заалт нь Үндсэн хуулийн суурь үзэл баримтлалд харшилж, Монгол Улсын Үндсэн хуулийн зохих зүйл хэсэгт нийцээгүй гэж үзэн хүчингүй болгохоор эцэслэн шийдвэрлэсэн.

Гэтэл Үндсэн хуулийн цэцийн шийдвэр эцсийн болохын хувьд Үндсэн хуульд орсон өөрчлөлтийн уг эхийг нотлох, хадгалах, албан ёсны эх болгох, цаашилбал Үндсэн хуульд кодификац хийх, хэлэлцэн шийдвэрлэх хууль, эрх зүйн боломжгүй байгаа тул Монгол Улсын Их Хурлын чуулганы хуралдааны дэгийн тухай хууль болон Монгол Улсын Үндсэн хуульд нэмэлт, өөрчлөлт оруулах журмын тухай хуульд нэмэлт оруулах тухай хуулийн төслийг боловсруулсан хэмээн хууль санаачлагчид танилцууллаа.

Энэ талаар УИХ-ын гишүүн Н.Энхболд "Үндсэн хуулийн цэцийн 02 дугаар тогтоолын гол агуулга бол энэ асуудлыг цогцоор нь, гишүүдийн тоо, хавсран гүйцэтгэгч Засгийн газрын гишүүн байж болох гишүүдийн тоо, тогтолцоо хамт явах учир дээрх дөрвөн хуульд нэмэлт, өөрчлөлт оруулж байж холбогдох асуудлыг шийдвэрлэхээр нь зөв" гэв. 

М.Сүхэхэй