УИХ-ын гишүүн Н.Алтанхуяг дараах байр суурийг илэрхийллээ. Тэрбээр "Сайд хүн сайн, муу ажиллах нь дээлтэй дээлгүйгээс хамаарахгүй. Салбараа мэдэж байна уу, улс төрийн мэдрэмжтэй байна уу, ажил зохион байгуулах чадвар ямар байна гэдэг л чухал. Жишээ татвал, БНХАУ-ын хилээр орж ирсэн бараа Монгол улсын хилээр орж ирээд 20 хоног гацаж байна. Үүнд салбарын сайд, тэр салбарт ажиллаж байгаа хүмүүс буруутай. Энэ бол цэвэр зохион байгуулалттай холбоотой, тиймээс нарийн ухаан шаарддаг ажил биш.  Зарим сайд хариуцлагагүй ажиллаж байгааг УИХ-ын гишүүн гэдэгтэй нь холбохгүй. Зүгээр л хариуцлагагүй, ажлаа мэдэхгүй байна.

Сайдын босгыг намхан болгож, ганц харайгаад орж ирэхээр болгочихсон. Ингэж болохгүй. Наад зах нь УИХ-д суугаад улс орны бүх төрлийн асуудлыг сонсоод, оролцоод үзчихсэн хүн байх хэрэгтэй. Эвсэл салбартаа үнэхээр сайн хүн хэрэгтэй. Гэхдээ салбартаа сайн байлаа гээд сайн зохион байгуулагч гэсэн үг биш.

М.Энхболд УИХ-ын даргаар ажиллаж байх үедээ мэргэжлийн Засгийн газар байгуулна гэсэн. Гэтэл гийгүүлсэн нь хаана байна. Одоо тэгтэл “мэргэжлийнх нь болдоггүй юм байна улстөрч сонгоё” гээд байдаг. Монголд салбараа мэддэг, чадвар сайтай хүн олон байгаа. Яагаад заавал 76 гишүүн дотроос хайх ёстой юм бэ, тэрийг ойлгохгүй байна. Одоо уг нь ингэж явах цаг биш. Ард түмний амьдрал өдрөөс өдөрт дордож, шатахууны үнэ, бараа бүтээгдэхүүний үнэ нэмэгдэж байна. Үүндээ анхаарал хандуул л даа. Намрын ургацдаа анхаараад явж байх ёстой байтал юун есөн хүн Үндсэн хуулийг өөрчлөөд байгаа юм" хэмээв. 

Т.Мөнхжаргал