Гадаад харилцааны сайд Б.Батцэцэг, БНСУ-ын Гадаад хэргийн сайд Пак Жин нар өнөөдөр албан ёсны хэлэлцээ хийлээ. Хэлэлцээний үр дүнгийн талаар мэдээлэл хийж байна.

Гадаад харилцааны сайд Б.Батцэцэг "Пак Жин сайдтай найрсаг, ажил хэрэгч уур амьсгалд үр дүнтэй дээд түвшинд тохирсон Монгол Улс, БНСУ-ын стратегийн түншлэлийн тухай хамтарсан тунхаглалын мөрөөр хэрэгжүүлж буй бодит ажлуудыг хэлэлцэж, хамтын ажиллагааг таван тулгуур чиглэлд өргөжүүлэн, бэхжүүлэх талаар тохиролцлоо. Монгол Улс, БНСУ нь ардчилал, хүний эрх, эрх чөлөө, зах зээлийн эдийн засгийн харилцааны нийтлэг үнэт зүйлстэй. Хоёр улсын улс төрийн яриа хэлэлцээг эрчимжүүлж гадаад бодлого, аюулгүй байдал, батлан хамгаалах асуудлаар стратегийн яриа хэлэлцээний механизмыг бэхжүүлэх талаар санал нэгдлээ. Энэ хүрээнд Монгол Улс, БНСУ-ын Засгийн газар хоорондын хамтарсан хороо, Гадаад хэргийн яамд хоорондын стратегийн зөвлөх, уулзалт зэрэг яриа хэлэлцээг бэхжүүлж энэ онд багтан ээлжит уулзалтуудыг зохион байгуулахаар тохирлоо.

"Алсын хараа 2050" урт хугацааны бодлого, "Шинэ сэргэлтийн бодлого"-ыг БНСУ-ын "Шинэ Засгийн газрын бодлого"-той уялдуулан тээвэр ложистик, эрчим хүч, байгаль орчин, уул уурхай, дэд бүтэц, соёлын салбарт үр ашигтай хамтран ажиллах, бүтээн байгуулалтын томоохон төсөл хөтөлбөрүүдийг хамтран хэрэгжүүлэх талаар үр бүтээлтэй санал солилцлоо. 

Хөшгийн хөндийн шинэ нисэх онгоцны буудлыг бүс нутгийн хэмжээнд тээвэр, ложистикийн зангилаа болгох, Хөшгийн хөндийд шинэ хот, эдийн засгийн чөлөөт бүс байгуулах хүрээнд БНСУ-ын Инчеоны чөлөөт бүс байгуулсан туршлагыг судлахад хамтран ажиллахаар тохирлоо. Мөн хоёр улсын хооронд Эдийн засгийн түншлэлийн хэлэлцээ байгуулна.           

БНСУ-д амьдардаг Монгол иргэдийн амьдрах орчныг сайжруулах, эмчилгээний зорилгоор зорчих иргэдэд визийн нөхцөлд хөнгөлөлт үзүүлэх, хоёр улсын хооронд агаарын нислэгийг нэмэх зэргээр хамтарч ажиллана. Мөн тус улсад 45 га талбайд мод тарих, тус улсаас үзүүлдэг хөгжлийн хөтөлбөрийг үргэлжлүүлэх талаар тохиролцлоо. Мөн дээрх хөтөлбөрийн дагуу 10 аймагт дулааны станц барих ажил үргэлжилж байна.

Т.Мөнхжаргал