АН-ын дарга С.Эрдэнэ, УИХ-ын гишүүн Д.Ганбат нар мэдээлэл хийлээ. 

АН-ын дарга С.Эрдэнэ "Намын үндсэн дүрмийн дагуу УИХ-ын дэд дарга С.Одонтуяа, УИХ-ын гишүүн О.Цогтгэрэл, Ш.Адьшаа, Б.Бейсен нарыг найман жилийн хугацаатай АН-ын гишүүнчлэлээс хасах шийдвэр гаргалаа. Ингэснээр УИХ дахь бүлгийн тоонд намын гишүүдийн тоо хүрэхгүй болсон. Учир нь АН-ын 11 гишүүнээс удирдлагын хурлаар Ц.Туваан, Н.Ганибал, Ж.Батсуурь нарыг хасаж найман гишүүний бүрэлдэхүүнтэй үйл ажиллагаа явуулж байсан.

Харин өнөөдөр дээрх нэр бүхий дөрвөн гишүүнийг намын гишүүнчлэлээс хасаж УИХ-ын гишүүн Ж.Батсуурьт оногдуулсан сахилгын шийтгэлийг хүчингүй болгож намын гишүүнчлэлийн бүрэн эрхийг сэргээж байна. Ингэснээр цаашид УИХ-д АН таван гишүүнтэйгээр үйл ажиллагаа явуулна.

Монгол Улсын Их Хурлын тухай хуулийн 31.1-т “УИХ-ын сонгуулийн дүнгээр УИХ-д наймаас доошгүй суудал авсан нам, эвсэл бүлэг байгуулж болно” гэж заасан. Тэгвэл АН-ын гишүүд хуульд заасан тоонд хүрэхгүй болсон тул УИХ дахь АН-ын бүлгийг татан буулгаж байгааг албан ёсоор мэдэгдэж байна. Энэ талаар УИХ-ын дарга Г.Занданшатарт санал хүргүүлж байна. Цаашид тогтвортой байдлыг хангах үүднээс цаашид АН-ын таван гишүүн өөрийн зөвлөлийг байгуулж ажиллана. Зөвлөлийн даргаар УИХ-ын гишүүн Д.Ганбатыг томилсон” гэв.

Т.Мөнхжаргал