Засгийн газрын хуралдаанаас гаргасан шийдвэрийг танилцуулж байна. Энэ үеэр ЗГХЭГ-ын дарга Д.Амарбаясгалан мэдээлэл өглөө.

Тэрбээр "Өнөөдрийн хуралдаанаар төрийн бүтээмжийг дээшлүүлэх чиглэлд анхаарч ажиллахаар ярилцлаа. Төрийн хэмнэлтийн тухай хууль хэрэгжиж эхэлснээр 2022 оны төсвийн жилд 5.8 тэрбум төгрөгийн хэмнэлтийг хийх тооцоо гарсан.

Хэрэгжилтийг ирүүлсэн 39 төсвийн ерөнхийлөн зарцуулагч нь үйл ажиллагандаа Төрийн хэмнэлтийн тухай хуулийг мөрдүүлэн ажилласнаар 5.7 тэрбум төгрөг, хэмнэлт гарч буй хуулийн зүйл заалтаар харвал дэд, тэргүүн дэд, орлогч даргын орон тоог бууруулан ажиллах заалтын хүрээнд 159 дэд, тэргүүн дэд орлогчийг чөлөөлсөн.

Үүний дүнд 1.4 тэрбум төгрөгийн төсвийн хэмнэлтийг энэ жилд гаргахаар төлөвлөсөн.

Сайдаас доош түвшний албан тушаалтны автомашины хэрэглээг хязгаарлаж, төсвийн ерөнхийлөн захирах шийдвэрээр өөрсдийн эзэмшилд байсан 587 ширхэг автомашиныг унахгүй битүүмжилж, Засгийн газрын авто баазад хүлээлгэн өгсөн.

Ингэснээр урсгал зардлаас 264 сая төгрөгийг хэмнэсэн.

Төрийн албаны ёс зүйг эрхэмлэх, төр татвар төлөгчдийн мөнгийг хэмнэх зэрэг хуулийн бусад заалтуудын хэрэгжилт хангалттай түвшинд явахгүй байна гэж Засгийн газар үзлээ. Тиймээс ЗГХЭГ-ын даргаар ахлуулсан ажлын хэсэг байгуулагдаж, энэхүү хуулийн хэрэгжилтэд богино хугацаанд үнэлэлт дүгнэлт өгөхөөр шийдвэрлэсэн. Асуудал байгаа бол ирэх оны төсөв хэлэцэхээс өмнө тодорхой асуудлууд дээр бодлогоо өөрчлөх буюу амьдралд нийцүүлэх алхамуудыг хийж байя гэсэн зорилтуудыг Засгийн газрын зүгээс тавьж байна" гэв.

Д.Батчулуун