Зам тээврийн сайд С.Бямбацогт Дарханы зам дээр ажиллаад иржээ. Энэ замын таван багц ажил дээр найман компанийн 1500 шахам ажилчин 700 орчим техник хэрэгсэлтэйгээр ажиллаж байгаа юм байна.

Гэсэн ч 2 болон 4 дүгээр багцын ажил хэтэрхий удааширснаас Дарханы зам хүн, машин, байгальд хохирол учруулсаар буй билээ. Газар дээр нь очиж ажилласан Зам, тээврийн сайд С.Бямбацогт, “Хоёр болон дөрөвдүгээр багцын ажил хоцорч байгаагийн нэг шалтгаан цементийн тасалдал. Нэг өдөрт 1000 тн цемент шаардлагатай байгаа. Гэтэл олдож байгаа нь 400-500 тн л байна. Хөтөлийн цементийн үйлдвэр засварт орчихоогүй байсан бол ийм хүндрэл гарахгүй байх боломж байлаа. Цементийн ханган нийлүүлэлтийг тасалдуулахгүй байхад хүч тавина. Энэ жилдээ нэг урсгалын хоёр эгнээний хөдөлгөөнийг нээхээр хичээнэ” гэсэн юм.

Жич: Дарханы замыг дөрвөн эгнээ бүхий хатуу хучилттай авто зам болгон өргөтгөн шинэчлэх шийдвэрийг 2018 онд Засгийн газар гаргасны дараа таван багц бүхий тендер зарлан ажлыг эхлүүлээд байв. Энэ таван багц нь. 

I багц - Улаанбаатраас баруун аймаг салах тойрог уулзвараас Хар модот давааны ар хүртэлх 37.26 км,

II багц - Хар модот давааны араас Урьхан хүртэл 45,5 км,

III багц Урьханаас Сүмбэр хүртэлх 45,74 км,

IV багц Сүмбэрийн уулзвараас Цайдамын хөндий хүртэлх 45,08 км,

V багц Цайдамын хөндийгөөс Дарханы тойрог уулзвар хүртэлх 30.53 км автозамын барилгын гүйцэтгэлийг аж ахуйн нэгжүүд тус тус гэрээгээр гүйцэтгэж буй юм.

О.Балдан-Очир