Засгийн газрын хуралдаанаас гарсан зарим шийдвэрийг ЗГХЭГ-ын дарга Д.Амарбаясгалан танилцууллаа.
Аж ахуйн нэгжүүдэд хүнд суртал үүсгэж буй төрийн давхардсан бүтцийг ойлгомжтой болгох, хялбаршуулах бодлого баримталж байгааг Засгийн Газрын Хэрэг Эрхлэх Газар(ЗГХЭГ)-ын дарга Д.Амарбаясгалан өнөөдөр хийсэн мэдээлэлдээ онцоллоо.
Энэ хүрээнд Мэргэжлийн Хяналтын Ерөнхий газрын чиг үүргийг өөрчлөхийг Ерөнхий сайд үүрэг болгожээ. Тодруулбал, яамдад байх ёстой зарим мэргэжлийн чиг үүрэг бүхий хяналт шалгалтыг тухайн яамдад шилжүүлэх юм байна.
"Мэргэжлийн хяналтын нэр, зорилгыг өөрчилж, төр өөрөө өөрийгөө хянадаг, хяналт шалгалтаа хийдэг байгууллага хийдэг болгож өөрчлөх зорилго тавьж байна. Аливаа шатанд хуулийг хэрэгжүүлэх үйл явц нь мэргэжлийн дагуу явагдаж байна уу, үгүй юу гэдэг дээр төр өөрийгөө хянадаг байх зорилгоор 2023 оны төсвийг өргөн барихдаа МХЕГ-ыг өөрчлөн байгуулах саналаа УИХ-д өргөн барина.
Өөрөөр хэлбэл, ЗГХЭГ Ерөнхий сайдын хуулиар хүлээсэн үүргийн дагуу хуулийн хэрэгжилтэд хяналт тавьдаг байгууллага болж өөрчлөгдөнө" гэв. Бүх яам хяналт шалгалтын хэлтэстэй болно гэсэн үг биш.
Мэргэжлийн чиг үүрэг бүхий хяналт шалгалтыг тухайн яамдад хэрхэн шилжүүлэх талаар сэтгүүлчид тодруулахад тэрбээр "Хэрхэн яаж шилжүүлэх тухай үйл ажиллагаа одооноос эхэлнэ. Гэхдээ ямар нэг байдлаар орон тоо нэмэх зэрэг давхардсан бүтэц бүрэлдэхүүн бий болгохгүй гэдэгт бүрэн итгэж болно. Тухайлбал, зайлшгүй шаардлагатай хяналт, шалгалт буюу Сангийн яам дэргэдээ санхүүгийн хяналт шалгалтаа аваад явж байгаагийн адилаар зөвхөн зарим яам дээр л үүнийг зохион байгуулна.
Түүнээс хавтгайрсан байдлаар бүх яам хяналт шалгалтын хэлтэстэй болно гэсэн үг биш" гэсэн тайлбар өгсөн юм.
