“Эмэгтэй парламентчдын чуулган-2022” Төрийн ордонд болж байна. Энэ үеэр УИХ-ын гишүүн асан Д.Оюунхорол үг хэллээ.

Тэрбээр "30 жилийн Парламентын түүхэнд анх удаа эмэгтэйчүүдийн чуулган хийж буй, үүнийг санаачилсан Төрийн байгуулалтын байнгын хороо, НҮБ, Одонтуяа даргадаа талархал илэрхийлье. Энэ бол маш чухал сэдэв байсан. Улс төрд нэр дэвшээд сонгогдсон гишүүд дөрвөн жил төрийн бодлогыг боловсруулахад оролцож байсан. Энэ бол Монголын төрийн боловсон хүчний бодлогын капитал юм. Үүнийг уламжлал болгон ажил хэрэг болгоосой хэмээн үзэж байна.

Эмэгтэйчүүдийн зөвлөл УИХ-ын даргын дэргэд байгуулагдах боломжтой юм хэмээн бодож байна.

Монголын бүх эмэгтэйчүүдийн байгууллагууд эмэгтэйчүүдийн улс төрийн оролцоог нэмэгдүүлэх чиглэлээр нам харгалзахгүй нэгдэж чаддаг байсан.

Энэ бол Монголын улс төрийн 30 жилийн түүхэнд бий болсон соёл юм. Заримдаа цөөнх болж байсан үе бий.

Үлдэгдлийн зарчим бол өнөөдөр хэвээрээ явж байна. Дарга гэдэг суудал эрчүүдийнх, гүйцэтгэх түвшинд ажиллах нь эмэгтэйчүүдийнх. Өнөөдөр ч үүнийг өөрчилж чадаагүй. Эмэгтэйчүүд эвлэлдэн нэгдэж чаддаггүй. Энэ сул талыг эрэгтэйчүүд ашигладаг. Эрэгтэйчүүд нэг тохироо хийчихвэл тэр хүнийхээ төлөө бат нягт байж чаддаг. Энэ сул талаараа эрэгтэйчүүдэд олзлогдох гээд байдаг. Энэ алдааг засахад жижигхэн асуудал бий гэж хардаг” гэв.

Д.Батчулуун