Ардчилсан залуучуудын холбооноос С.Эрдэнийг АН-ын тамгыг 200 сая төгрөгөөр зарах гэж байгаа талаар мэдээлсэн. Улмаар Шонхор тауэрт байрлах АН-ын байранд очиж С.Эрдэнэд шаардлага хүргүүллээ.

Энэ үеэр С.Эрдэнэ гарч ирж шаардлагыг хүлээж аваад ийн хэлэв. Тэрбээр "Ардчилсан намыг хэн нэгэн Оросын гар хөл, тагнуулд өгч самруулахгүйн тулд би зогсож байгаа шүү. Яг үнэндээ Х.Баттулгад ямар ч тамга байхгүй. Ц.Туваанд би тамга хүлээлгэж өгөөгүй.

Наймдугаар сарын 23-нд болсон намын их хурлаар олонхын санал авч сонгогдсон хүнд дамжуулж өгөөрэй гэж тухайн үед Ц.Туваанд үүрэг өгсөн болохоос өөрт нь өгөөгүй. Түүний дараа Ц.Туваан үүрэг биелүүлээгүй тул тамгаа авъя гэж Улсын бүртгэлийн ерөнхий газарт хуулийн дагуу нэхэмжлэл гаргасан. Улсын бүртгэлийн ерөнхий газар сонсох ажиллагаа явуулаад хоёр удаа Ц.Тувааныг дуудсан, тэр ирээгүй. Ирээгүй учир тамгыг үрэгдүүлсэн гэж үзээд холбогдох газар зар тавь гэсэн. Бид зараа тавьсан.

Улсын бүртгэлийн ерөнхий газрын байцаагч хяналт тавьж Ц.Туваанд байгаа тамгыг хүчингүй болгоод надад шинээр тамга тэмдгийн эрхийг олгосон. Үүнд хууль зөрчсөн ямар нэг зүйл байхгүй. Нийслэлийн захиргааны хэргийн давж заалдах шатны шүүхээс “тамга маргаангүй, С.Эрдэнэд байгаа тамга хууль ёсных” гэдэг давж заалдах эрхгүй эцсийн шийдвэрээ гаргасан.

Би АН-ын дарга байгаа цагт хэн нэгэн коммунистуудаар тоглуулахгүй. Тэр тусмаа Монгол орны эрх чөлөө, боломжийг худалдсан Х.Баттулга, түүнийг дагалдан байгаа хүмүүсээр тоглуулахгүй. Манай нам дотор ямар ч хуваагдал байхгүй. Энэ бол Монголыг хорлож байгаа, Монголын ардчиллыг үгүй хийх гэсэн оролдлого” гэв.

Т.Мөнхжаргал