ШХАБ-ын дээд хэмжээний уулзалтад оролцож байгаа Монгол Улсын Ерөнхийлөгчийн Гадаад бодлогын зөвлөх Э.Одбаяраас Ерөнхийлөгч У.Хүрэлсүхийн хийсэн уулзалтуудын талаар тодруулснаа манай тусгай сурвалжлагч А.Болдбаатар Узбекистанаас мэдээлж байна.
-Монгол Улсын Ерөнхийлөгч ШХАБ-ын дээд хэмжээний уулзалтын үеэр зарим орны төрийн тэргүүн, олон улсын байгууллагын удирдлагуудтай хоёр талт болон гурван талт уулзалт хийлээ. Ямар асуудлуудыг онцлон ярилцав?
-Монгол Улсын Ерөнхийлөгч ШХАБ-ын хуралд оролцохоос гадна маш олон хоёр талт уулзалтуудыг хийж байна. НҮБ-ын Ази-Номхон далайн эдийн засгийн нийгмийн комиссын даргатай уулзлаа. Ази-Номхон далайн бүс нутагт НҮБ-ын хүрээнд хэрхэн хамтарч ажиллах вэ, Ерөнхий нарийн бичгийн дарга Антонио Гуттеришийн айлчлалаас хойш ямар ажлуудыг бүс нутагтаа хийх вэ, тэр айлчлалын мөрөөр хэрэгжих ажлын төлөвлөгөөнд тусгагдсан ажлуудыг Ази-Номхон далайн бүс нутагт хэрхэн цогцлоож ажиллах вэ гэдэг асуудлуудыг ярилцлаа. Узбекистан Улсын Ерөнхийлөгчтэй хоёр талын харилцааны талаар маш дэлгэрэнгүй санал солилцлоо. Манай хоёр улс дипломат харилцаа тогтоосноос хойш багагүй хугацаа өнгөрсөн. Гэсэн хэдий ч идэвхтэй хамтын ажиллагаа хараахан өрнөөгүй байсан. Энэ нь Узбекистан улсын түүхтэй холбоотой, 2016 оноос илүү нээгдэж байгаа. Нээгдэж байгаа процесс нь өнөөдрийн энэ айлчлал. Хоёр талын харилцан ашигтай хамтын ажиллагааг ярилцлаа.
-Хоёр талын уулзалтад оролцсон бусад талууд ямар санал санаачилга гаргаж байв?
- Узбекистаны зүгээс эдийн засгийн хамтын ажиллагааг эрчимжүүлье. Ялангуяа худалдааны эргэлтийг нэмэгдүүлье гэдэг санал тавилаа. Узбекистаны хувьд манай улстай түүхэн холбоотой. Соёл, боловсролын салбарт ч мөн эрчимтэй хамтын ажиллагааг өрнүүлье гэж байна. Тэгэхээр манай зүгээс харилцан ашигтай хамтын ажиллагааг Узбекистан улстай бүх л салбарт хөгжүүлэх боломжтой гэдгээ Монгол Улсын Ерөнхийлөгч илэрхийлсэн. Энэ айлчлалын хүрээнд хоёр талын хамтын ажиллагааг явуулахын тулд харилцан Элчин сайдын яамдаа нээх энэ асуудлыг судалж үзэхээр болсон.
-Гурван талт уулзалтын талаар?
-Энэ удаагийн гурван талт уулзалт тогтсон форматын дагуу ажил хэрэгч болж өндөрлөлөө. Гурван улс гурвуул байр сууриа илэрхийлсэн. Тодорхой асуудлуудыг хөндсөн. Эдийн засгийн коридорын талаар маг дэлгэрэнгүй ярилаа. Анх удаа гурван тал гурвуулаа хийн хоолойн асуудлыг ярилаа. Энэ бол бодитой хэрэгжихээр харагдаж байна гэсэн үг. Мөн цар тахлын дараах эдийн засгийн сэргэлтийн энэ үед боомтын асуудлыг ч гэсэн нааштай авч үзэж, шаардлагатай газар нь зохицуулалт хийж , нээж болох газар нь нээж, төмөр замыг ч мөн адил холбож болох газар нь холбож эдийн засгийн коридорын хөтөлбөрийг амжилттай, эрчимтэй хөгжүүлье гэдэгт гурван тал байр сууриа илэрхийлээд санал нэгдлээ. Энэ бол маш том, урагш алхсан алхам болсон.
-Боомт дээр тодорхой нэр зааж асуудал яригдсан уу?
-Бүх л боломжит боомтуудыг нээж ажиллая, шинэ нөхцөл байдал үүссэн энэ шинэ цагт шинэ хамтын ажиллагааг хамтдаа зураглаж, хамтдаа төлөвлөж, харилцан ашигтай байх зарчмаар хамтран ажиллая гэсэн гурван талын харилцан ойлголцол сая үүслээ.
-Өнөөдөр болох ШХАБ-ын дээд хэмжээний хуралд Монгол Улсын Ерөнхийлөгч ямар байр суурь илэрхийлэх вэ?
-Өнөөдөр ШХАБ-ын өргөтгөсөн хурал болно. Ажиглагчийн байр сууриас үг хэлнэ. Мэдээж Монгол Улс ШХАБ-ын ажиглагчийн хүрээнд энэ бүс нутагт олон ажлыг дэмжиж хамтарч ирсэн, үүнийгээ үргэлжлүүлнэ. Үүнээс гадна харилцан ашигтай хамтын ажиллагааг ШХАБ-ын бүх гишүүн орнуудтай нь олон тулгуурт гадаад бодлогын хүрээнд нээлттэй, эрчимтэй үргэлжлүүлж хэрэгжүүлнэ гэдэг байр сууриас хандаж үг хэлнэ.
