Гавьяат эдийн засагч, Монголбанкны Ерөнхийлөгч Б.Лхагвасүрэнгийн талаар бичихийн өмнө хэдэн тоо сануулъя. 

Монголбанкны өчигдрийн хаалтын ханшаар ам.доллар 3301 төгрөгт (Наймар шарга зах дээр 3480 төгрөгт) хүрлээ. Харин Монголбанкны Ерөнхийлөгч Б.Лхагвасүрэн энэ албан тушаалд томилогдсон 2019 оны 11 сарын 22-нд энэ ханш 2706 төгрөг байлаа. Тэр ажлаа авах үед Монгол Улсын гадаад валютын албан нөөц 4015.5 сая ам.доллар байсан бол өнөөдөр харин 2695.6 сая ам.долларын нөөцтэй гээд сууж байна. Шуудхан хэлэхэд, тэр томилогдсон цагаасаа хойш ханшаа алдсан, бас нөөцөө барсан. Аан бас нэг “алдуул” бий нь инфляц. Улсын инфляц 5.2 хувь, Улаанбаатар хотын инфляц 5 хувьтай байхад нөхөр Б.Лхагвасүрэн Монголбанкны Ерөнхийлөгч болсон бол өнөөдөр харин Улаанбаатар хотын болон улсын инфляц 14-14.8 хувьд хүрчихлээ.

Тодруулбал, иргэд жил болгон орлогынхоо 14 хувийг зөвхөн үнийн өсөлтөд алдахад хүргэж байгаа юм. Харин төгрөгөө арчилж, инфляцыг доод түвшинд барьж байх учиртай Төв банк юу хийж байна. Худал хэлдэггүй нүцгэн тоо гэж үг бий. Дээрх харьцуулсан тоон үзүүлэлт Монголбанкны өнөөгийн удирдлагад хариуцлага тооцох хангалттай шалтгаан биш үү. 

Гайхалтай нь, тэр хариуцлага хүлээсэнгүй, харин ч гавьяат эдийн засагчийн зэрэг нэмээд сууж байна. Ер нь Б.Лхагвасүрэн гэж хэн бэ?, хэний дэмжлэгээр өнөөдрийн өндөр албан тушаалд томилогдож, гавьяат цолыг өөртөө, “гай барцдаа ард түмэнд үүрүүлчхээд суудаг талаарх үндсэн сэдэвтээ одоо оръё.

Монголбанк бол УИХ-ын харьяа байгууллага. Тиймээс спикер хэн байна, төв банканд төлөөний хүнээ тавьдаг бичигдээгүй хуультай. Харин Б.Лхагвасүрэн бол Г.Занданшатарын томилгоотой ч Ерөнхийлөгч асан Х.Баттулгын тавиул. 

Өмнөх парламентын үед УИХ дахь МАН-ын бүлэг 32/33 гэж хуваагдаж, М.Энхболдыг спикерээс нь буулган, Г.Занданшатарыг томилсон. Улмаар М.Энхболдын үеийн Төв банкны дарга Н.Баяртсайханыг чөлөөлж, Б.Лхагвасүрэнг томилуулсан юм. Харин уг томилгоог хийлгэх нөлөөг Г.Занданшатарт Х.Баттулга иртэй бяртай байх үедээ хийсэн гэж саарал ордны “тамхины цэг”-ээр яригддаг. 

Б.Лхагвасүрэн нь Х.Баттулгын эзэмшлийн “Талх чихэр” компанид ажиллаж явсан П.Дэлгэрнарангийн хадам юм. Өөрөөр хэлбэл, П.Дэлгэрнаран бол Б.Лхагвасүрэнгийн төрсөн дүүгийн нөхөр юм. Эндээс л “тавиул” Б.Лхагвасүрэн эзнийхээ дарамтан доор “өрөө төлөх” гэж гүрийж байгаагаас биш төгрөгийг ханшийн уналтаас хамгаалах, инфляцыг бууруулах, гадаад валютын нөөцийг бүрдүүлэх үндсэн ажлаа огт хийсэнгүй. Бас арилжааны банкнуудыг хянаж, зохицуулж байх үүргээ биелүүлсэнгүй, Капитал банк, Чингис хаан банкийг дампуурах хэмжээнд нь тулгаж, татвар төлөгчдийн болон иргэн, аж ахуйн нэгжийн мөнгийг эрсдэлд оруулав.

Хөгжлийн банканд хүүгээ ажилд оруулж, газрын захирал, ураг саднаа төрийн яам, банкнуудаар тараан байршуулсан, Банкны тухай хууль тогтоомжийг ноцтойгоор зөрчиж, Хаан банкны хувьцаа зарагдах процесст Д.Сумъяабазар тэргүүтэй албан тушаалтны үгээр бичиг хийж шидсэн. Энэ бүхэн түүнийг огцруулах хангалттай шалтгаан нь энэ юм.

О.Балдан-Очир