Хүнс, хөдөө аж ахуй, хөнгөн үйлдвэрийн сайд Х.Болорчулуун, дэд сайд Ж.Бат-Эрдэнэ нар яамны харьяа байгууллагуудын үйл ажиллагаатай танилцаж, ажилтан албан хаагчидтай биечлэн уулзаж, цаашдын бодлого зорилтын талаар санал солилцож байна. Өнөөдөр Мал эмнэлгийн ерөнхий газар, "Хөдөө аж ахуйн бирж" ХХК-д ажиллалаа.
Манай улсын хэмжээнд 1270 малын эмч ажилладаг бөгөөд тэдний ачаалал олон улсын жишигтэй харьцуулахад 5-6 дахин их байна. Монгол Улс 2004 онд үхрийн мялзан, 2022 онд үхрийн цээж өвчингүй, тайван болохыг Дэлхийн мал, амьтны эрүүл мэндийн байгууллагаас баталгаажуулсан. Цаашид бусад төрлийн өвчингүй болгох ажлыг үе шаттай хэрэгжүүлж, баталгаажуулахаар ажиллаж байгааг Мал эмнэлгийн ерөнхий газрын дарга Д.Батчулуун мэдээлэлдээ дурдлаа.
Уулзалтын үеэр Хүнс, хөдөө аж ахуй, хөнгөн үйлдвэрийн сайд Х.Болорчулуун “Хүний эмч зөвхөн хүнийг эмчилдэг бол малын эмч хүн төрөлхтөнийг эмчилдэг” гэж Оросын их эрдэмтэн Павлов хэлсэн байдаг. Мал эрүүл, хүнс аюулгүй байх нь мал эмнэлгийн салбарын үйл ажиллагаанаас ихээхэн хамаардаг болохыг онцлов. Мөн Засгийн газрын гол бодлогын нэг нь махны экспорт. Олон улсын жишгийн дагуу мах экспортлоход малын эрүүл мэнд хамгийн гол хөшүүрэг учир мэргэжлийн байгууллага, малын эмч нар уялдаа холбоотой, түргэн шуурхай, хичээл зүтгэлтэй, хариуцлагатай ажиллахыг үүрэг болгосон юм.
